Tashqi ishlar weziri déywid lamiy xitay ziyaritide “Uyghur qirghinchiliqi” ni otturigha qoyushqa chaqirildi

En'gliye tashqi ishlar weziri déywid lamiy (David Lammy) kéyinki heptide xitay ziyaritige baridighan bolup, ziyaret harpisida her sahe kishilirining Uyghur qirghinchiliqini otturigha qoyush heqqidiki chaqiriqlirigha duch keldi.

“Kündilik pochta” gézitining 9-öktebirdiki xewiride éytilishiche, emgekchiler partiyesidin bolghan déywid lamiy 2024-yili iyuldiki omumiy saylamda yéngip chiqishtin ilgiri “Nawada biz saylamda yengsek Uyghur qirghinchiliqini resmiy jakarlaymiz” dégeniken.

Bu qétim en'gliyediki asasliq partiyelerdin bolghan konsérwatiplar partiyesining ezaliri uning eyni waqitta bash wezir namzati bolghan kér starmér (Keir Starmer) bilen birlikte “Saylamda yengsek en'gliye-xitay munasiwitige qaytidin qarap chiqimiz, shuningdek shinjangda boluwatqan ishlarning qirghinchiliq ikenlikini élan qilimiz” dep wede bergenlikini eskertken. Konsérwatiplar partiyesining sabiq yétekchiliridin i'an dunkan simis (Iain Duncan Smith) yillardin buyan Uyghur qirghinchiliqi heqqide eng küchlük söz qiliwatqan siyasiyonlardin biri bolush süpitide, “Déywid lamiy üchün kéyinki heptilik ziyaret emgekchiler partiyesining Uyghur qirghinchiliqi heqqidiki wedisini emelge ashurushining eng yaxshi pursiti” dégen.

En'gliye axbarat sahesining bildürüshiche, déywid lamiy nöwette xitay bilen bolidighan munasiwetni tengsheshni bash wezipe qilghanliqi üchün, eyni waqittiki Uyghur qirghinchiliqi heqqide bergen wedisini emelge ashurushta bekmu chong til qisinchiliqigha duch kelgen. U bu heqte söz qilip “Biz her ikki terep qoshulmaydighan mesililerde éniq ipade bildürimiz. Xitay bilen bolghan munasiwitimiz xiris, riqabet we hemkarliq asasida berpa qilinidu” dégen.

Melum bolushiche, déywid lamiy ilgiri xitay tashqi ishlar ministiri wang yi bilen uchrashqan bolup, söhbet jeryanida Uyghurlar mesilisini otturigha qoyghaniken. En'gliye parlaménti 2021-yili aprélda Uyghur irqiy qirghinchiliqi heqqide resmiy qarar alghan bolsimu, en'gliye hökümiti bu mesilide izchil süküt qilip kelmekte.