Әнгилийә кеңәш палата әзаси уйғур мәҗбурий әмгики вә панаһлиқ мәсилиси тоғрулуқ һөкүмәткә соал қойған

Мухбиримиз җәвлан
2022.11.18

Әнгилийә кеңәш палата әзаси давид лортон (David Lorton) явропа парламентиниң “уйғур районидики мәҗбурий әмгәк мәһсулатлири, шундақла мәҗбурий әмгәктин пайдилинидиған хитай карханилириниң мәһсулатлирини импорт қилишни чәкләш” қарариниң әнгилийәдә иҗра қилиниш әһвали һәмдә тайландики уйғур мусапирлириниң панаһлиқ ишлири тоғрулуқ әнгилийә һөкүмитигә соал қойған.

17-Ноябир күни давид лортонниң тор бетидә елан қилинған мәзмундин қариғанда, давид лортонниң бу соаллириға әнгилийәниң дипломатийә вә дөләт тәрәққияти ишлириға мәсул кеңәш палата әзаси әһмәд (Ahmad) җаваб бәргән.

 У давид лортонниң  әнгилийә һөкүмитиниң явропа парламентиниң қарарини қанчилик иҗра қилалиғанлиқи һәққидә сориған соалиға җаваб берип, “биз шинҗаңдики кишилик һоқуқ дәпсәндичиликигә аит чиқиватқан пакитларға, җүмлидин мәҗбурий әмгәк мәсилисигә йеқиндин диққәт қилдуқ вә униңға күчлүк тәдбир қолландуқ. Өткән йил биз әнгилийә ширкәтлиригә уйғур районида сода қилмаслиқ, мәҗбурий әмгәк мәһсулатлирини алмаслиқ, әгәр хилаплиқ қилса җазаға учрайдиғанлиқи һәққидә көрсәтмә бәрдуқ” дегән.

Давид лортон йәнә тайландтики уйғур мусапирлириниң панаһлиқ мәсилиси тоғрулуқ соал қойғанда, әһмәд униңға җаваб берип: “әнгилийә һөкүмити барлиқ дөләтләрни уйғур мусапирлирини хитайға қәтий қайтурмаслиққа вә өз мәсулийитини ада қилишқа чақирип кәлди. Биз тайланд һөкүмитидин у йәрдә тутуп турулуватқан уйғурлар мәсилисини соридуқ. Биз йәнә уларни хәлқара қанун-келишимгә әмәл қилип, уйғурларни қайтуруп бәрмәсликкә давамлиқ чақирип туримиз” дегән.        

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.