En'giliye kéngesh palata ezasi Uyghur mejburiy emgiki we panahliq mesilisi toghruluq hökümetke so'al qoyghan

En'giliye kéngesh palata ezasi dawid lorton (David Lorton) yawropa parlaméntining “Uyghur rayonidiki mejburiy emgek mehsulatliri, shundaqla mejburiy emgektin paydilinidighan xitay karxanilirining mehsulatlirini import qilishni cheklesh” qararining en'giliyede ijra qilinish ehwali hemde taylandiki Uyghur musapirlirining panahliq ishliri toghruluq en'giliye hökümitige so'al qoyghan.

17-Noyabir küni dawid lortonning tor bétide élan qilin'ghan mezmundin qarighanda, dawid lortonning bu so'allirigha en'giliyening diplomatiye we dölet tereqqiyati ishlirigha mes'ul kéngesh palata ezasi ehmed (Ahmad) jawab bergen.

 U dawid lortonning  en'giliye hökümitining yawropa parlaméntining qararini qanchilik ijra qilalighanliqi heqqide sorighan so'aligha jawab bérip, “Biz shinjangdiki kishilik hoquq depsendichilikige a'it chiqiwatqan pakitlargha, jümlidin mejburiy emgek mesilisige yéqindin diqqet qilduq we uninggha küchlük tedbir qollanduq. Ötken yil biz en'giliye shirketlirige Uyghur rayonida soda qilmasliq, mejburiy emgek mehsulatlirini almasliq, eger xilapliq qilsa jazagha uchraydighanliqi heqqide körsetme berduq” dégen.

Dawid lorton yene taylandtiki Uyghur musapirlirining panahliq mesilisi toghruluq so'al qoyghanda, ehmed uninggha jawab bérip: “En'giliye hökümiti barliq döletlerni Uyghur musapirlirini xitaygha qet'iy qayturmasliqqa we öz mes'uliyitini ada qilishqa chaqirip keldi. Biz tayland hökümitidin u yerde tutup turuluwatqan Uyghurlar mesilisini soriduq. Biz yene ularni xelq'ara qanun-kélishimge emel qilip, Uyghurlarni qayturup bermeslikke dawamliq chaqirip turimiz” dégen.