En'gliye bash ministiri xitayning Uyghurlarni qollighan parlamént ezalirigha émbargo yürgüzüshini “Qobul qilghili bolmaydu” dégen

Washin'gtondin muxbirimiz erkin teyyarlidi
2024.05.10

En'gliye bash ministiri rishi sunak bilen tashqi ishlar ministiri deywid kamiron, Uyghurlarni qollishi sewebidin xitayning jazalishigha uchrighan besh neper en'gliye parlamént ezasi bilen körüshken. Rishi sunak béyjingning bu kishilerge jaza qoyushini “Qobul qilghili bolmaydighanliqi” ni bildürgen.

Melum bolushiche, körüshüshte xongkong türmisidiki öktichi jimiy ley, xitayning en'gliyediki kungzi institutliri, uniwérsitétlarning xitaygha tayinip qélishi, teminlesh zenjiri we mejburiy emgek qatarliq témilar muzakire qilin'ghan. Xewerlerde yene, parlamént ezalirining xitayni en'gliyening “Chet el tesir küchini tizimlash qa'idisi” ge kirgüzüp, uning en'gliyediki herikitige bolghan nazaretni kücheytishni telep qilghanliqi qeyt qilinmaqta.

Bu körüshüsh, bezi en'gliye parlamént ezaliri en'gliyeningmu amérika we yawropa ittipaqigha oxshash qanun chiqirip, Uyghur mejburiy emgek mehsulatlirini qattiq chekleshni, bolmisa en'gliye xitay mejburiy emgek mehsulatlirining tökme qilip sétish bazirigha aylinip qélishi mumkinlikini agahlandurghan bir waqitta élip bérilghan. “Xelq'ara parlaméntlar ara xitay birleshmisi” ning X ta élan qilghan uchuridin melum bolushiche, bash ministir rishi sunak bilen tashqi ishlar ministiri deywid kamiron 8-aprél en'gliye yuqiri palata ezasi deywid alton, barone héléna kinidi, awam palata ezasi sir i'ayan dankun simit, nusret gheni we né'il obérayin qatarliqlar bilen körüshken.

Bu siyasé'onlar en'gliye parlaméntining xitayning Uyghurlargha irqiy qirghinchiliq qilghanliqini étirap qilishida halqiliq rol oyghan. Xitay da'iriliri, en'gliyening 2021-yili 3-ayda amérika, yawropa ittipaqi we kanada bilen birliship, Uyghur diyaridiki töt neper xitay emeldari bilen “Shinjang ishlepchiqirish qurulush bingtüeni” ge émbargo yürgüzüshige qarshi, bu besh neper parlamént ezasini jazalighan idi. En'gliye tashqi ishlar ministiri kamiron X tiki hésabida, “Biz xitayning en'gliye parlamént ezalirini jazalishidin dawamliq chongqur endishe qilmaqtamiz” dep körsetken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.