Әнглийәдә “шейин” гуруһиниң пай чекини аммиға сетиши әдлийәниң баһалишиға дуч келидикән

Ройтерис агентлиқи (Reuters) ниң 3-февралдики мәхсус хәвиригә асасланғанда “уйғур қирғинчилиқини тохтитиш гурупписи” әнглийәниң пул-муамилә назарәт идариси хитайниң мода кийим-кечәк парчә сетиш ширкити болған “шейин” (Shein) гуруһиниң пай чекини аммиға сетиш (IPO) ни тәстиқлиса, бу делони әдлийә оргининиң баһалишиға сунидикән.

Ройтерс агентлиқиниң 2024-йили 12-декабирдики мәхсус хәвиригә асасланғанда, әнглийәниң пул-муамилә назарәт идариси хитайниң мода кийим-кечәк парчә сетиш ширкити болған “шейин” гуруһиниң пай чекини аммиға сетиш (IPO) ни тәстиқлашниң созулуп кетиватқанлиқини билдүргәниди. Шуниң билән бир вақитта әнглийә пул-муамилә назарәт идарисиниң “шейин” ниң тәминләш зәнҗирини назарәт қиливатқанлиқи вә уйғурларниң кишилик һоқуқини қоғдаш гуруппилириниң әйибләшлири түпәйли “шейин” ға мунасивәтлик қануний хәтәрни баһалаватқанлиқи мәлум.

Тәкшүрүшләр нәтиҗисидә “шейин” ширкити намида дуняниң һәрқайси җайлирида кәң сетиливатқан мода кийим-кечәкләрниң хәлқарада “шинҗаң пахтиси” дәп тонулидиған пахтида ишләпчиқирилғанлиқи, бу пахтиларниң болса уйғурларниң мәҗбурий әмгики асасида терилидиғанлиқи ениқланғаниди. Мәлум болушичә, “шейин” гуруһиниң 2024-йиллиқ тиҗарәт соммисиниң 50 милярд америка доллириға йәткәнлики мөлчәрләнмәктә.

Америка таратқулири, 1-феврал трамп һөкүмитиниң хитайға қарши йолға қойған йеңи таможна беҗиниң амазонниң күчини қайтидин әслигә кәлтүрүп, хитай ширкәтлири болған тему вә шеинниң америкада тез сүрәттә өсүшигә қаттиқ зәрбә беридиғанлиқини илгири сүрмәктә.