Әнглийәниң сунак һөкүмити уйғур мәҗбурий әмгикидин пайда елишқа йол қоюш билән әйибләнди

Әнглийәниң риши сунак һөкүмити кишилик һоқуқ тәшкилатлири тәрипидин әнглийә ширкәтлириниң уйғур мәҗбурий әмгикидин пайда елишиға йол қоюш билән әйибләнгән. Әнглийәдики “Byline Times” гезити, кишилик һоқуқ тәшкилатлири вә әмгәк һәқлирини қоғдаш органлириниң әнглийә һөкүмитини хитайда ишләпчиқирилған (уйғур) мәҗбурий әмгәк мәһсулатлириниң әнглийәдә сетилишиниң алдини елишта йетәрлик тәдбир қолланмиди, дәп әйиблигәнликини билдүргән. Кишилик һоқуқ тәшкилатлири вә әмгәк һәқлирини қоғдаш органлириниң ейтишичә, әнглийә бу җәһәттә иттипақдашлириниң арқисида қалған болуп, бу мәҗбурий әмгәктә булғанған мәһсулатларниң әнглийәдә төкмә қилип сетилиш хәвпини пәйда қилмақта икән.

Әнглийә һөкүмитигә қаритилған бу тәнқид әнглийә ташқи ишлар министири җеймис кливерлийниң буниңдин бир һәптә аввал хитайни зиярәт қилип, зиярәттә “әнглийәниң шинҗаңдики уйғурларниң кәң көләмлик тутқун қилинишиға болған күчлүк туйғусини ипадилигәнлики” ни билдүрүшиниң арқисидинла оттуриға қоюлған. Хәвәрдә ейтилишичә, ярдәм тәшкилатлири, паалийәтчиләр вә ширкәтләр, әнглийәниң һазирқи мәвҗут “заманиви қуллуқни чәкләш қануни” ниң уйғур районидики мәҗбурий әмгәкни чәкләштә йетәрлик әмәсликини қәйт қилишқан. Хәвәрдә йәнә әнглийәдә сетиливатқан мәһсулатларниң йәнила мәҗбурий әмгәккә четишлиқ болуши мумкинликини, чүнки хитайда пахтиниң 80 пирсәнтидин көпрәки уйғур районидин чиқидиғанлиқини, күнтахтиға кетидиған полисиликон мәһсулатиниң йерими уйғур районида ишләпчиқирилидиғанлиқи билдүрүлгән.

Дуня уйғур қурултийиниң әнглийәдә турушлуқ вәкили рәһимә мәһмутниң “Byline Times” ға ейтишичә, “уйғур районида мәҗбурий әмгәкниң кәң көләмдә мәвҗутлуқини көздә тутқанда, уйғурлар вәтинидин кәлгән һәр қандақ мәһсулатниң қараңғу тарихий бар” икән. Әнглийәдики парчә сатқучиларниң әң чоң вәкиллик органи болған “әнглийә парчә сетиш бирләшмиси” болса һөкүмәтниң кишилик һоқуқ назарәт қануни чиқиришини, қуллар әмгикигә қарши мустәқил комиссар тәсис қилишини тәләп қилған.