Әнглийә парламент әзаси әнглийәни уйғур мәҗбурий әмгикини чәкләшкә мунасивәтлик қанун турғузушқа чақирған

Вашингтондин мухбиримиз ирадә тәйярлиди
2024.05.09

Әнглийә парламент әзаси алишия кейрнис (Alicia Kearns) ханим әнглийәни уйғур мәҗбурий әмгики билән ишләпчиқирилған мәһсулатларни чәкләшкә мунасивәтлик тәдбир турғузуп чиқишқа чақирған.

Алишия ханим әнглийә парламентида қилған сөзидә, американиң 2021-йили уйғур мәҗбурий әмгикигә тақабил туруш қануни турғузуш арқилиқ, уйғурларниң қан-тәрини сүмүрүш билән булғанған мәһсулатларни чәклигәнликини, явропа иттипақиниңму һазир мәҗбурий әмгәк мәһсулатлирини чәкләшкә мунасивәтлик бир қанун чиқириш алдида туруватқанлиқини әскәртип, “әгәр әнглийәму дәрһал мушундақ импорт чәклимиси турғузуп чиқмайдиған болса, мәҗбурий әмгәк мәһсулатлирини төкмә қилип сатидиған йәргә (dumping ground) айлинип қалиду” дәп әскәрткән.

У өзиниң “X” тики һесабида қилған сөзидиму, хитай игидарчилиқидики “канада қуяш енергийәси” намлиқ күнтахта ширкитиниң уйғурларниң мәҗбурий әмгики билән зич мунасивәтлик икәнликигә даир толуқ мәлуматлар бар туруқлуқ, әнглийәниң бу ширкәткә өзиниң муһим миллий енергийә ул әслиһәлирини қурушиға йол қоюшини “сараңлиқ” дәп тәнқидлигән.

Алишия кейрнис ханим әскәртип “өзимизниң импорт контроллуқи болмиса, әнглийә дуняви йүзлиништин чәтнәп кетиду. Биз хәлқаралиқ шериклиримизниң йетәкчиликидә меңишимиз вә күнтахта тәминләш зәнҗирини җиддий һалда тазилишимиз керәк” дегән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.