Әнглийә дөләт мудапиә вәзири шаппс: “соғуқ уруштин кейинки тинчлиқ дәври ахирлашти”

Вашингтондин мухбиримиз ирадә тәйярлиди
2024.01.18

Әнглийә дөләт мудапиә вәзири грант шаппс (Grant Shapps) әнглийәниң кәлгүси 5 йил ичидә хитай, русийә вә иран билән урушқа кириш вәзийитигә дуч келиши мумкинликини илгири сүргән.

“америка авази” радийосиниң хәвәр қилишичә, грант шаппс бу сөзни 15-январ дүшәнбә күни лондонда сөзлигән бир нутқида ейтқан. У, “дуняда соғуқ мунасивәтләр урушидин кейин шәкилләнгән тинчлиқ вә өз ара мәнпәәт дәври ахирлашти, әнглийә кәлгүси бәш йил ичидә русийә, хитай, иран вә шималий корейәгә четилидиған бир қанчә җәң мәйданида бирла вақитта урушқа кириш еһтималиға дуч келиши мумкин” дегән.

Шапс, хитай вә русийәгә охшаш дүшмән дөләтләрниң өз-ара мунасивитиниң қоюқлишип кәткәнликини, уларниң уруш иттипақи түзүп, бир-биригә ярдәм бериватқанлиқини тилға алған, шундақла буниң кишини әндишигә салидиған бир тәрәққият икәнликини билдүргән.

У сөзидә хитайниң ядро қоралиға игә дөләт болуштин сирт, илғар һәрбий қоралларни тәрәққий қилдуруватқанлиқини, хитайниң тор һуҗумлириниңму бүгүнгичә әнглийәгә зор зиянларни салғанлиқини әскәрткән. У, әнглийә вә башқа демократик дөләтләрниң тақабил туруш иқтидарини өстүрүши лазимлиқини тәкитлигән.

Әнглийә дөләт мудапиә вәзири шаппс йәнә мундақ дегән: “һазирқи мурәккәп дуня вәзийитидә һечқандақ бир дөләт өз алдиға риқабәткә тақабил туралмайду. Шуңа әнглийә өз иттипақдашлири билән һәмкарлиқни ашуриду, ‛шималий атлантик әһди тәшкилати‚ ниң 75 йиллиқини тәбрикләш мунасивити билән өткүзүлидиған маневирға 20 миң әскирий хадим әвәтиду”.

Униң дейишичә, бу қетимлиқ маневир соғуқ мунасивәтләр уруши ахирлашқандин буянқи әң чоң маневирниң бири болуп, қатнашқучилар “шималий атлантик әһди тәшкилати” ға әза 30 дөләт вә шиветсийәдин тәшкил тапидикән.

Шаппс йәнә мундақ дегән: “биз һазир бир йол еғизида туруватимиз. Биз бу йолда яки түгимәс хәтәргә тәслим болимиз яки униң алдини елиш үчүн қолимиздин келидиған тиришчанлиқларни қилимиз. Бизниң әркинликимизни қоғдап қелиш үчүн тәйярлиқ қилиштин башқа иккинчи бир таллишимиз йоқ”.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.