Xitay hökümiti en'giliye bilen yéqindin hemkarlishish koyigha kirgen

2-Ayning 13-küni, en'giliye tashqi ishlar ministiri dawid lammi (David Lammy) en'gliyege ziyaretke barghan xitay tashqi ishlar ministiri wang yini kütüwalghan. 2-Ayning 8-küni london sheher merkizide, xitayning chong kölemlik elchixana sélishigha qarshi 4000 kishilik namayish ötküzülgendin kéyin, wang yining london'gha kélishi diqqet qozghimaqta.

“Ruytérs agéntliqi” ning 13-féwral xewer qilishiche, bu, wang yining 10 yildin buyan en'gliyeni resmiy ziyaret qilishi hésablinidiken. Wang yi en'gliyege kélishtin ilgiri, xitay tashqi ishlar ministirliqi bayanat élan qilip, xitayning en'giliye bilen munasiwitini téximu kücheytip, soda we meblegh sélish jehette hemkarliqini ilgiri sürüshni xalaydighanliqini jakarlighan.

Xewerde déyilishiche, en'giliyediki emgekchiler partiyesi 2024-yil 7-ayda hakimiyet béshigha kelgendin kéyin xitay bilen munasiwitini yaxshilashni eng muhim diplomatiyesining biri qilghan؛ uningdin ilgiri, konsérwatiplar partiyesi hakimiyette turghan mezgilde, en'giliye-xitay munasiwiti yéqinqi dewrdiki eng nachar nuqtigha kelgeniken.

Dawid lammining ruytérs agéntliqigha bildürüshiche, u wang yi bilen xelq'ara xewpsizlik, ukra'ina urushi we ottura sherq mesilisi heqqide söhbetleshken. U yene kishilik hoquq mesilisi, en'giliye parlamént ezalirigha qoyulghan jaza cheklimisi, xongkong démokratlirining qamaqqa élinishi dégendek mesililerde xitaygha dawamliq gep qilidighanliqini bildürgen.