Uyghurlarni qollash sewebidin xitayning jazalishigha uchrighan en'giliye parlamént ezasi jibutidin chiqiriwétilgen

Washin'gtondin muxbirimiz erkin teyyarlidi
2024.04.29

Uyghurlarni izchil qollash sewebidin xitayning jazalishigha uchrighan en'giliye parlamént ezasi tim lofton (Tim Loughton), xitayning sherqiy afriqadiki ittipaqdishi jibutida tutqun qilinip chégradin qoghlap chiqirilghan.

En'giliye konsérwatiplar partiyesidin bolghan jim lofton, en'giliye awam palatasining qarar maqullap, Uyghur irqiy qirghinchiliqini étirap qilishida aktip rol oynighan palata ezalirining biridur. U, Uyghur, tibet, xongkong mesililiride xitayni qattiq tenqid qilip kelgen, xitay hökümiti shu sewebtin 2021-yili en'giliye parlaméntining tim la'oftonni öz ichige alghan yette neper ezasigha jaza yürgüzgen idi.

En'giliye LBC radiyosining 28-aprél xewer qilishiche, tim lofton qisqa muddetlik bir ziyarette bolush üchün jibutigha qon'ghanda ayrodurumda tutup qélin'ghan we chégradin qoghlap chiqirilghan. Xewerlerde, uning jibuti chégrasidin qoghlap chiqirilishining Uyghurlarni qollishi bilen munasiwetlik ikenliki we xitayning körsetmisi bilen bolghanliqi qeyt qilinmaqta.

LBC Ning bildürüshiche, tim lofton en'giliyening “Télégraf” gézitide élan qilghan obzorida, “Bu weqe jazalashqa uchrighan yette neper en'giliye parlamént ezasining 3 yildin béri iztirap chékiwatqanliqining eng yéngi misali” dep körsetken. Tim lofton “Télégraf” gézitidiki obzorda mundaq dep yazghan: “Lékin buni bizning gherbtiki démokratik hökümet organlirimizda biz qollighan milyonlighan tibet, Uyghur, xongkongluqlar we bashqilarning nechche on yillar mabeynide uchrawatqan zorawanliq, qiyin-qistaq we qatilliqlar bilen sélishturghanda, bu elwette erzimes bir hadise hésablinidu.”

Melum bolushiche, jibuti sherqiy afriqadiki kichik bir dölet bolsimu, lékin u xitayning “Bir belwagh bir yol” istiratégiyesidin chong menpe'et éliwatqan dölet iken. Xitay jibutining yéngi tenterbiye meydani, doxturxanisi we port qurulushini bir milyard dollar meblegh bilen teminligen. Melum bolushiche, nöwette jibuti xitaygha bir milyard 400 milyon dollar qerzge boghulghan iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.