En'gliyede sétiliwatqan xitay déngiz mehsulatliriningmu Uyghur mejburiy emgikide bulghan'ghanliqi ilgiri sürülmekte

Washin'gtondin muxbirimiz erkin teyyarlidi
2023.11.06

Yéqinda amérikadiki “Qanunsiz okyan layihesi” teshkilati tekshürüsh doklati élan qilip, amérika bazirigha import qiliniwatqan xitay déngiz mehsulatlirining Uyghur mejburiy emgikige chétilghanliqini ashkarilighan idi. En'gliye “Asman xewerliri” torining 5-noyabir bergen xewiride, Uyghur mejburiy emgikide ishlepchiqirilghan xitay déngiz mehsulatlirining ilgiri islandiyede sétilghanliqi, hazir en'gliye talla bazarlirida sétiliwatqan bolushi mumkinlikini bildürgen.

“Asman xewerliri” torining bildürüshiche, islandiyening fastnét béliqchiliq shirkiti bilen wéstbrij yémeklik shirkiti xitayning shendungdiki déngiz mehsulatliri shirkiti- “Méyjya guruhi” ning xéridari iken. Halbuki, “Qanunsiz okyan layihesi” ning doklatida, “Méyjya guruhi” ning Uyghur mejburiy emgek küchlirini ishlitidighanliqi körsitilgen.

“Asman xewerliri” ning qeyt qilishiche, “Méyjya guruhi” 2021-yili özining torida maqale élan qilip, “Uyghurlarning jungxu'a milletliri a'ilisige qoshulush üchün ularning zawutigha kelgenliki” ni teshwiq qilghan. Eyni waqitta “Asman xewerliri” ning muxbiri “Méyjya guruhi” ning zawutigha bérip sürüshte qilghan bolsimu, emma zawut diréktori bu zawutta Uyghurlarning ishleydighanliqini ret qilghan. Shundaqla “Méyjya guruhi” mu toridiki maqalini derhal éliwetken iken. “Asman xewerliri” torining bildürüshiche, nöwette islandiyening “Fastnét” béliqchiliq shirkiti “Méyjya guruhi” bilen bolghan alaqisini üzgenlikini éytqan. Lékin xewerde xitayning yene bir déngiz mehsulatliri shirkiti bolghan “Chishen guruhi” ning Uyghurlarni ishlitidighanliqi, bu shirketning en'gliye lyons déngiz mehsulatliri shirkitini mehsulat bilen teminleydighanliqi, lékin lyons shirkitining buninggha inkas qayturmighanliqini éytqan. “Asman xewerliri” torining bildürüshiche, xitaydin yawropagha yollan'ghan déngiz mehsulatliri gollandiyening rottérdam porti arqiliq en'gliyege kiridiken. Xewerde bezi déngiz mehsulatlirining rottérdamda qayta qachilinidighanliqi, buning iz qoghlashni qiyinlashturghanliqini bildürgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.