En'giliye tashqi ishlar ministiri xitaygha qandaq taqabil turushning chariliri üstide izdiniwatqanliqini bildürgen

Yéqinda en'giliye tashqi ishlar minsitiri liz tras (Liz Truss) Uyghurlargha irqiy qirghinchiliq yürgüzüwatqan xitay hakimiyitige qandaq taqabil turushning chariliri üstide izdinip kéliwatqanliqini bildürgen.

Nyu-york shehiride chiqidighan “Büyük éra” (The Epoch Times) gézitining bu heqtiki xewiride éytilishiche, liz trasning bu ipadisi en'giliye parlamént ezalirining uzundin béri hökümetke Uyghurlar uchrawatqan irqiy qirghinchiliqni étirap qilish toghruluq bésim qilishi bilen munasiwetlik iken.

Liz tras en'gliyening bash ministirliq saylimigha chüshidighan muhim namzatlarning biri bolup, eger u kéler aydiki saylamda utup chiqalisa, Uyghur irqiy qirghinchiliqi mesilisige köngül bölidighanliqi we xitay hökümitining jinayitidin hésab soraydighanliqini bildürgen.

En'giliye parlaménti Uyghur irqiy qirghinchiliqini étirap qilghan bolsimu, emma en'giliye hökümiti “Buninggha xelq'ara sot qarar bérishi kérek” dep passip turuwalghanidi.  Liz tras yéngi hökümetning bu mesilide aktip bolushi kéreklikini bildürüp: “Emeliyet shuki, xelq'ara sot sistémisi buningda rol oyniyalmaydu, biz uninggha qarap turalmaymiz. Shunga men bu ishta kargha kélidighan bashqa méxanizimlarni ishlteleymizmu-yoq dégen mesilide izdiniwatimen,” dégen.