Әнгилийә авам палатаси хитайниң уйғурларға йүргүзүп келиватқан бастуруш җинайәтлирини "ирқий қирғинчилиқ" дәп җакарлиди

Мухбиримиз җәвлан
2021-04-22
Share
mejburiy-emgek-guwahliq-UK Уйғурлар дияридики мәҗбурий әмгәк мәсилиси һәққидә әнглийә парламентида өткүзүлгән гуваһлиқ бериш йиғинида әнглйә парламентиниң әзаси нусрәт ғәни ханим сөз қилмақта. 2020-Йили 5-ноябир
parliamentlive.tv

Әнгилийә парламенти авам палатаси тор бетиниң мәлуматиға қариғанда, әнгилийә авам палатаси 22-апрел (пәйшәнбә күни) уйғурларға йүргүзүлүп келиватқан кишилик һоқуқ вә инсанийәткә қарши җинайәтни бекитиш муһакимә йиғини өткүзгән. Нәтиҗидә әнгилийә авам палатаси әзалири уйғурларни асас қилған райондики йәрлик милләтләрниң ирқий қирғинчилиқ вә инсанийәткә қарши җинайәтниң зиянкәшликкә учриғучилири икәнликини бирдәк етирап қилған. Мәзкур йиғинда хитайниң җинайәтлирини рәсмий "ирқий қирғинчилиқ" дәп җакарлиған. Бу әнгилийә парламентиниң тунҗи қетим толуқ аваз билән хитайниң җинайитини "ирқий қирғинчилиқ" дәп җакарлиши болуп, буниң билән әнгилийә америка, канада вә голландийәдин кейин уйғурларниң ирқий қирғинчилиққа учраватқанлиқини рәсмий җакарлиған 4-дөләт болуп қалған.

Ройтрес агентлиқиниң хәвәр қилишичә, әнгилийә парламент әзалири консерватиплардин болған парламент әзаси нусрәт ғени оттуриға қойған бир тәклип лайиһәсини қоллиған болуп, бу тәклип лайиһәсидә уйғурларниң ирқий қирғинчилиққа вә инсанийәткә қарши җинайәтниң зиянкәшликигә учраватқанлиқи очуқ ейтилған һәмдә әнгилийә һөкүмитиниң хәлқара қанунлардин пайдилинип, бу җинайәтни аяғлаштуруши керәклики чақириқ қилинған. Шундақтиму әнгилийә һөкүмити хитайниң җинайитини "ирқий қирғинчилиқ" дәп җакарлаштин өзини йәнә қачурған болуп, министирлар "ирқий қирғинчилиққа сот мәһкимиси һөкүм чиқириши керәк," дәп пикир баян қилишқан.

Әнгилийә авам палатасиниң уйғур районидики кишилик һоқуқ мәсилисини музакирә қилиш йиғини 2019-йил 1-айда вә 2020-йил 3-айда икки қетим өткүзүлгән болуп, һәр қетимда уйғурларниң һоқуқини қоғдашқа даир тәклипләр мәлум сандики қарши авазлар түпәйлидин өтмәй кәлгән вә хитайниң җинайитиниң характерини бекитиш тоғрисида қарар бериш кейингә сүрүлгәниди.

Игилинишичә, әнгилийә авам палатасиниң тарихта тунҗи қетим хитайниң уйғур районидики бастуруш җинайәтлирини "ирқий қирғинчилиқ" дәп җакарлиши сиясәт вә иҗраат җәһәттин биваситә чәкләш күчигә игә болмисиму, әнгилийә һөкүмитини хитайға қарши сиясәт түзүштә бесим қилиш ролини ойнайдикән. Әң муһими, әнгилийәниң америка вә канадаға охшаш иттипақдашлири билән зич һәмкарлишип, хитайниң инсанийәткә қарши җинайитигә ортақ тақабил турушида зор әһмийити бар икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт