En'gliye parlaménti Uyghur "Irqiy qirghinchiliqi" da mes'uliyiti bar xitay emeldarlirini jawabkarliqqa tartishni telep qilghan

Muxbirimiz erkin
2021-05-28
Share

En'gliye parlaméntining yuqiri palatasi 27-may dunyadiki "Irqiy qirghinchiliqlar" heqqide munazire élip bérip, en'gliye hökümitini Uyghur "Irqiy qirghinchiliqi" da mes'uliyiti bar xitay emeldarlirini jawabkarliqqa tartishqa, ularni jazalashqa chaqirghan. Bu en'gliye parlaméntining bu yil 22-aprél xitayning Uyghurlargha tutqan mu'amilisini "Irqiy qirghinchiliq" dep étirap qilghandin kéyin tunji qétim bu qirghinchiliqning sadir qilghuchilirini jawabkarliqqa tartishni munazire qilishidur.

Yighinda yuqiri palata ezasi lord deywid alton hökümetning bu mesilidiki pozitsiyesini tenqidlep, uning néme üchün hazirgha qeder chén chü'en'goni jazalimighanliqigha so'al qoyghan. U, imbargoning "Xongkong walisi keri lemge yürgüzülip, biraq tibetning sabiq partkom sékrétari, hazirqi shinjang partkomining sékrétari chén chü'en'godeklerge yüzgüzülmesliki bek ghelitilik" dégen.

Yuqiri palata ezasi lord jon browén hökümetning "Irqiy qirghinchiliq" ni sot belgilisun, dégen maydanini tenqidlep, "Rusiye bilen xitay ret qilidighan ehwalda siz buni sot qarar qilsun déyelmeysiz, chünki, bu ehwalda héchqandaq sot bu déloni körüp chiqmaydu" dégen.

En'gliye hökümiti xitayning Uyghurlarni basturushini qattiq tenqid qilip, bu mesilini her xil xelq'ara sehnilerde otturigha qoyup kelgen bolsimu, biraq uning herikiti yéterlik emes, dep qarilip, uning xitaygha qarshi téximu keskin tedbirlerni élishi, xitay emeldarlirini xelq'ara jinayi ishlar sotigha tartishning yolini qilishi telep qilinip kelgenidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet