Adwokatlar en'gliye parlaméntigha xu'awéyning Uyghur qullar emgikidiki roli heqqide telep sundi

Muxbirimiz erkin
2020.06.29

En'gliyediki bir adwokatlar guruppisi en'gliye partlaméntining bir komitétigha iltimas sunup, xu'awéy shirkitining en'gliyede G5 qurulushigha qatnishish salahiyitini bikar qilishni, chünki bu shirket on minglighan Uyghurning qul qilinishi we mejburi emgekke sélinishida hökümetke yardemliship, özining bu qurulushqa qatnishish layaqitini yoqatqanliqini bildürgen. Bu iltimasni “Uyghur hoquqini qoghdighuchi adwokatlar” guruppisi en'gliyediki Uyghur pa'aliyetchi rehime mehmut, enwer toxtilargha walaleten en'gliye digital, medeniyet, axbarat we tenterbiye komitétigha sun'ghan.

Buningda adwokatlar guruppisidiki adwokat maykél polak we doktor aris jorjopolos rexime mehmut bilen enwer toxtining qanuniy wakaletchilikini üstige alghan. Bu guruppa 26-iyun élan qilghan bayanatida awstraliye istratégiye we siyaset institutining yéqinda élan qilghan doklatida xu'awéygha alaqidar uchurlarni ashkarlighanliqi, uningda “On minglighan Uyghurning ‛qayta terbiyelesh‚ lagérlirini püttürüp, xitayning herqaysi jayliridiki zawutlargha tarqitilghanliqi, uning ichidiki nurghun zawutlar xu'awéyning mal teminlesh zenjiri ikenlikini delillen'genliki” tekitlen'gen.

Bayanatta yene “Xitay da'irilirining ten jazasi, qulluqqa tutush, ahalilerni mejburiy yötkesh, türmige qamash, kishilerni erkinlikidin mehrum qilishtek xelq'ara qanunlarning tüp prinsiplirigha xilapliq qilish, mejburi toy qilish, hamilidar bolush, din, irq, milliti asasida jazlash we mejburiy ghayib qiliwétishni öz ichige alghan insaniyetke qarshi jinayet sadir qiliwatqanliqigha da'ir jiddiy bayanlarning barliqi” ni bildürgen. Bayanatta tekitlishiche, adwokatlar eger hökümet ularning iltimasigha jiddiy qarimisa, qanun'gha erz qilidighanliqini agahlandurghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.