Türkiye prézidénti erdoghan amérika ziyaritini bashlidi

Muxbirimiz méhriban
2017.05.16

Türkiye prézidénti erdoghan 16-may küni amérika ziyaritini bashlidi. Xewerlerdin melum bolushiche 16-may chüshtin kéyin amérikining yéngi nöwetlik prézidénti donald tramp aqsarayda türkiye prézidénti erdoghanni kütüwalghan, we ikki dölet bashliqi birleshme bayanat élan qilghan.

Amérikining s n n téléwiziyesi we amérika awazi radi'osi qatarliqlarning xewerliride amérika prézidénti donald tramp bayanatida amérika bilen türkiyening uzun yilliq dostluq hemkarliqi heqqide toxtilip, “Bizning nahayiti yaxshi bir dostluq hemkarliqimiz bar, biz bu xil munasiwetni téximu yaxshilashqa tirishimiz.Shunga biz küchlük we mustehkem muzakirilerde bolimiz” dégen sözliri neqil élin'ghan we türkiyening 1950-yillardiki koréye urushigha amérikini qollap esker ewetkenliki eslitip ötüldi.

Xewerlerde yene türkiye prézidénti erdoghanning amérika ziyaritidin ilgiri ikki dölet munasiwiti heqqide toxtilip éytqan sözidiki “Bu qétimqi amérika ziyariti türkiye-amérika munasiwitidiki yéngi yüksilishke yol achidu” dégen sözliri neqil élin'ghan. Türkiye prézidénti erdoghanning bu nöwetlik amérika ziyaritidiki meqsiti qiziqish qozghawatqanda, xelq'ara taratqularda yene prézidént erdoghanning amérikining yéngi nöwetlik prézidénti donald tramp bilen bolghan söhbitide türkiye-amérika munasiwitini ilgiri sürüshte otturigha qoyghan teleplirimu diqqet nuqtisi boldi.

“Washin'gton igzeminér” yeni “Washin'gton tekshürgüchisi” géziti, amérika awazi qatarliqlarning xewerliride yene türkiye prézidénti erdoghannning “Biz süriyediki islam döliti hökümranliqi rayonlirida amérikining kurd qoralliq küchliri yeni ‛kurd xelq qoghdighuchi etridi‚ YPG ni qoral bilen teminlishige qoshulmaymiz” dégen sözlirimu neqil élinip, türkiye prézidénti erdoghanning bu qétimqi amérika ziyaritining ötken hepte amérika prézidénti donald tramp süriyediki kurd qoralliq küchlirini qoral bilen teminleshke qoshulghanliqi sewebidin türkiye hökümiti qattiq naraziliq bildürüp bir heptidin kéyinki mezgilge toghra kelgenliki alahide eskertildi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.