Түркийә әрдоғанниң уйғур дияри һәққидә қилған сөзиниң “хата тәрҗимә” қилинип қалғанлиқини илгири сүрди

Мухбиримиз сада
2019.07.23

Хитай таратқулириниң хәвәрлири бойичә түркийә президенти рәҗәп таййип әрдоған 2-июлдики хитай зияритидә уйғур дияридики хәлқләрниң бәхтлик яшаватқанлиқини билдүргән иди. Һалбуки, йеқинда түркийә дипломатлири униң бу сөзлириниң “хата тәрҗимә” қилинип қалғанлиқини илгири сүргән.

“җәнубий хитай әтигәнлик гезити” ниң 22-июлдики хәвиригә қариғанда, түркийәниң бейҗиңда турушлуқ әлчиханисиниң дипломатлири өткән һәптә йепиқ йиғин ачқан. Йиғинда түркийә таратқулириниң рәҗәп таййип әрдоғанниң уйғур дияри һәққидә қилған сөзлирини хитай һөкүмәт таратқулириниң “хата тәрҗимә” қилип қолланғанлиқини байқиғанлиқи билдүрүлгән. Һалбуки, хитай тәрәпниң буни түзитишни рәт қилғанлиқи мәлум.

“шинхуа тори” дики хәвәрдә рәҗәп таййип әрдоғанниң уйғур дияридики хәлқләрниң интайин бәхтлик яшаватқанлиқини ейтқанлиқи баян қилинған. Һалбуки, түркийәдики мунасивәтлик хадимлар рәҗәп таййип әрдоғанниң әслидә “түркийә шинҗаң хәлқиниң хатирҗәм вә хушал-хурам яшишини үмид қилиду,” дегәнликини илгири сүргән.

Бу йил февралда түркийә ташқи ишлар министири чавушоғлу хитайниң уйғурларға тутқан муамилисини “инсанийлиқтики бүйүк оңайсизлиқ” дәп тәсвирлигән һәмдә уйғурлар мәсилисидә еғиз ачқан бирдинбир мусулман дөлити болуп қалған иди. Әмма бу қетим әрдоғанниң хитайдики зияритидә хитай сияситини махтап сөз қилиши вә түркийәниң илгирики мәйданидин йенивелиши көзәткүчиләрниң диққитини қозғиди.

Көзәткүчиләр, түркийә һәр қетим уйғур мәсилисидә хәлқара бесимларға дуч кәлгәндә илгирики мәйдани вә позитсийәсини өзгәртиш арқилиқ бесимдин қутулушқа урунуп кәлгәнликини илгири сүрмәктә.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.