Қирғизистанниң истанбулда турушлуқ баш консули әркин сәмәтниң өлтүрүлүш вәқәси сәвәблик вәзиписидин елип ташланған

Мухбиримиз әркин
2019-11-13
Елхәт
Пикир
Share
Принт

Қирғизистанниң истанбулда турушлуқ баш консули әркин сопокоф, 10‏-ноябир күни истанбулда әркин сәмәт исимлик уйғур тиҗарәтчиниң етип өлтүрүлүш вәқәсигә четилип вәзиписидин елип ташланған. Әркин сәмәт 10‏-ноайбир күни кәч саәт 8:00 ләрдә истанбулниң фатиһ районидики бир меһманханиниң чайханисида чай ечип олтурғанда қораллиқ икки киши тәрипидин етип өлтүрүлгән. Гумандарларниң қатиллиқ қилмиш муддиаси һазирға қәдәр сир болсиму, лекин әркин сәмәтниң қирғизистан билән болған сода мунасивити, шундақла у өлтүрүлгән җинайәт мәйданиниң әтрапидин қирғизистан консулханисиға аит тохтитип қоюлған бир аптомобилниң тепилиши көзәткүчиләрниң диққитини қозғиғаниди.

Мәлум болушичә, әркин сәмәт илгири қирғизистанниң баткәнт районида «абдуриз» намлиқ ширкәт қуруп, сода билән шуғулланғаникән. Бәзи хәвәрләрдә, баткәнттики «қирғиз-хитай сода базири» ниң униңға тәәллуқ икәнлики, униң алтун содиси қилидиғанлиқи, униң йеқинқи бир қанчә айда қирғизистандин чәтәл банкисиға нурғун доллар йөткигәнлики илгири сүрүлгәниди. 

«Азадлиқ радийоси» ниң ашкарилишичә, қатиллиқ мәйданиниң әтрапидин тепилған аптомобил қирғизистанниң истанбулда турушлуқ баш консули әркин сопокофниң аптомобили икән. Түркийәдики «һөррийәт» қатарлиқ гезитләр илгири бу аптомобилниң қатиллиқ вәқәси билән алақиси йоқлиқини илгири сүргән болсиму, лекин сопокофниң бу вәқә сәвәблик вәзиписидин елип ташлиниши көзәткүчиләрдә түркийә таратқулириниң юқириқи хәвиригә қарита гуман қозғимақта. 

«Азадлиқ радийоси» ниң хәвиридә қәйт қилинишичә, қирғизистан президенти соронбай җенбекоф 12‏-ноябир күни буйруқ чүшүрүп, әркин сопокофни вәзиписидин елип ташлиған. Қирғизистан ташқи ишлар министирлиқи шу күни елан қилған баянатида, аптомобил сопокофқа аит болсиму, лекин аптомобилниң тахта номури қирғизистан консулханисиниң намида қанунсиз тизимға елинғанлиқини илгири сүргән. Нөвәттә, қирғизистан таратқулириниң мәзкур вәқә һәққидики хәвәрлиридә асаслиқ тема әркин сәмәтниң немә үчүн өлтүрүлгәнликигә әмәс, бәлки униң чәтәлгә қанунсиз пул йөткәш, пул ююш билән әйибләнгәнликигә қаритилмақта. Бу һәқтики хәвәрләрдә, униң йеқинқи вақитларда қирғизистандин 11 чәтәл банка һесаб номуриға 646 милйон доллар йөткигәнлики илгири сүрүлгән. Мәлум болушичә, нөвәттә түркийә аманлиқ органлири қатиллиқ вәқәсигә четишлиқ 3 кишини тутқун қилған. Тутқунларниң иккиси қирғизистанлиқ, бири сүрийәлик икән.

Пикирләр (0)
Share
Толуқ бәт