Qirghizistanning istanbulda turushluq bash konsuli erkin semetning öltürülüsh weqesi seweblik wezipisidin élip tashlan'ghan

Muxbirimiz erkin
2019-11-13
Élxet
Pikir
Share
Print

Qirghizistanning istanbulda turushluq bash konsuli erkin sopokof, 10‏-noyabir küni istanbulda erkin semet isimlik Uyghur tijaretchining étip öltürülüsh weqesige chétilip wezipisidin élip tashlan'ghan. Erkin semet 10‏-no'aybir küni kech sa'et 8:00 lerde istanbulning fatih rayonidiki bir méhmanxanining chayxanisida chay échip olturghanda qoralliq ikki kishi teripidin étip öltürülgen. Gumandarlarning qatilliq qilmish muddi'asi hazirgha qeder sir bolsimu, lékin erkin semetning qirghizistan bilen bolghan soda munasiwiti, shundaqla u öltürülgen jinayet meydanining etrapidin qirghizistan konsulxanisigha a'it toxtitip qoyulghan bir aptomobilning tépilishi közetküchilerning diqqitini qozghighanidi.

Melum bolushiche, erkin semet ilgiri qirghizistanning batkent rayonida "Abduriz" namliq shirket qurup, soda bilen shughullan'ghaniken. Bezi xewerlerde, batkenttiki "Qirghiz-xitay soda baziri" ning uninggha te'elluq ikenliki, uning altun sodisi qilidighanliqi, uning yéqinqi bir qanche ayda qirghizistandin chet'el bankisigha nurghun dollar yötkigenliki ilgiri sürülgenidi. 

"Azadliq radiyosi" ning ashkarilishiche, qatilliq meydanining etrapidin tépilghan aptomobil qirghizistanning istanbulda turushluq bash konsuli erkin sopokofning aptomobili iken. Türkiyediki "Hörriyet" qatarliq gézitler ilgiri bu aptomobilning qatilliq weqesi bilen alaqisi yoqliqini ilgiri sürgen bolsimu, lékin sopokofning bu weqe seweblik wezipisidin élip tashlinishi közetküchilerde türkiye taratqulirining yuqiriqi xewirige qarita guman qozghimaqta. 

"Azadliq radiyosi" ning xewiride qeyt qilinishiche, qirghizistan prézidénti soronbay jénbékof 12‏-noyabir küni buyruq chüshürüp, erkin sopokofni wezipisidin élip tashlighan. Qirghizistan tashqi ishlar ministirliqi shu küni élan qilghan bayanatida, aptomobil sopokofqa a'it bolsimu, lékin aptomobilning taxta nomuri qirghizistan konsulxanisining namida qanunsiz tizimgha élin'ghanliqini ilgiri sürgen. Nöwette, qirghizistan taratqulirining mezkur weqe heqqidiki xewerliride asasliq téma erkin semetning néme üchün öltürülgenlikige emes, belki uning chet'elge qanunsiz pul yötkesh, pul yuyush bilen eyiblen'genlikige qaritilmaqta. Bu heqtiki xewerlerde, uning yéqinqi waqitlarda qirghizistandin 11 chet'el banka hésab nomurigha 646 milyon dollar yötkigenliki ilgiri sürülgen. Melum bolushiche, nöwette türkiye amanliq organliri qatilliq weqesige chétishliq 3 kishini tutqun qilghan. Tutqunlarning ikkisi qirghizistanliq, biri süriyelik iken.

Toluq bet