«Әркинлик сарийи» ши җинпиң диктаторилиқидики хитайда демократийәни илгири сүрүш темиси бойичә мәхсус сөһбәт уюштурди

Мухбиримиз қутлан
2018-06-06
Share

Америкидики «әркинлик сарийи» бүгүн, йәни 6-айниң 6-күни мәхсус сөһбәт уюштуруп, ши җинпиңниң һакиммутләқ һөкүмранлиқи астидики хитайда қандақ қилип демократийә вә әркинликни илгири сүрүш мәсилисини муһакимә қилди.

«Әркинлик сарийи» ниң бүгүнки мәхсус сөбитигә америкидики уйғур кишилик һоқуқ қурулушиниң тәтқиқатчиси зубәйрә шәмсидин ханим, әркин тибәт оқуғучилар тәшкилатиниң иҗраийә рәиси дорҗи сетен, тәйвән мустәқиллиқ һәрикитиниң актиплиридин лин фейфән вә хоңкоңлуқ сиясий паалийәтчиләрдин җефрей ниго қатарлиқ 4 киши тәклип қилинди.

«Әркинлик сарийи» ниң бүгүнки мәхсус сөһбитигә «һәрикәт рәһбәрлири ши җинпиңниң һакиммутләқ һөкүмранлиқидики хитайда әркинлик вә демократийәни һимайә қилиш һәққидә муһакимә йүргүзди» дәп мавзу қоюлған.

Бүгүнки сөһбәт һарписида радийомиз зияритини қобул қилған зубәйрә шәмсидин ханим өзиниң «бүгүнки шәрқий түркистанда немиләр болуватиду» дегән темида сөз қилидиғанлиқини билдүрди.

Зубәйрә ханим йәнә өзигә берилгән сөз пурситидә уйғур дияридики лагерлар һәққидә нуқтилиқ пикир баян қилидиғанлиқини, йәни бир милйондин артуқ уйғурниң қамалғанлиқи илгири сүрүлүватқан «тәрбийәләш лагерлири» ниң ич йүзи, лагерларда һаятидин айриливатқан бигунаһ кишиләр вә хитайниң уйғур диярида йүргүзүватқан пиланлиқ вә қәдәм басқучлуқ етник тазилаш һәрикити һәққидә тәпсилий учур беридиғанлиқини билдүрди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.