Ürümchide bir hepte ichide 2 milyon 300 ming ademning yadro kislata ewrishkisi élin'ghan

Muxbirimiz erkin
2020-07-24
Share

Uyghur aptonom rayonining merkizi ürümchide korona wirusi qayta tarqalghan yéqinqi bir hepte ichide az kem 2 milyon 310 ming kishining yadro kislata ewrishkisi tekshürülgen.

Ürümchi shehirining bashliqi yasin sidiqning 24-iyul ötküzülgen axbarat yighinida ashkarilishiche, 23-iyul bir künning özide 683 ming 95 kishining yadro kislatasi ewrishkisi heqsiz tekshürülgen. Xitay da'irilirining qisqighine waqit ichide nurghun maddiy we adem küchini seperwer qilip, bunchilik köp ademning yadro kislata ewriskisini tekshürüshi diqqet qozghidi.

Yasin sidiq 24-iyul ötküzülgen axbarat yighinida puqralarning özlirini "Chüshengenliki, qollighanliqi we hemkarlashqanliqigha rehmet éytidighanliqi" ni bildürüp, kéyinki qedemde "Yadro kislatasini tekshürüsh iqtidarini dawamliq östüridighanliqi" ni tekitligen. Xitay hökümiti 2016-yilimu nurghun maddiy we adem küchini seperwer qilip, Uyghurlargha qarita "Heqsiz salametlik tekshürüshi" élip barghan. Lékin kéyinrek bu tekshürüshning Uyghurlarning DNA ewrishkisini yighip, DNA ambiri qurush, Uyghurlarni DNA arqiliq kontrol qilish meqsitide élip bérilghanliqi melum bolghan idi.

Yasin sidiqning ashkarilishiche, bu qétimqi yadro kislata ewrishkisini tekshürüsh herikitige 7 ming xadim qatniship, kéche-kündüz ishligen. Xitay hökümiti hazirgha qeder korona wirusi yuqumining Uyghur diyarida qayta tarqilishigha qandaq amil seweb bolghanliqini élan qilip baqmidi. Shinxu'a agéntliqining bildürüshiche, 23-iyul küni rayonda 13 yéngi yuqumdar we 19 neper yuqum gumandari bayqalghan. Yéngi bayqalghan yuqumdarlarning hemmisi ürümchi shehiride iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet