خىتاي ئۆكتىچى سەنئەتكار ئەي ۋېيۋېي يېقىندا «سۈت پاراشوكى دۆلىتى» ناملىق بىر قۇراشتۇرما رەسىم ئىجات قىلغان. رەسىم 1815 دانە سۈت پاراشوكى قۇتىسى خىتاينىڭ دۆلەت خەرىتىسى شەكلىدە قۇراشتۇرۇلغان.
10 مېتىر كەڭلىك ۋە 8 مېتىر ئېگىزلىكتىكى بۇ رەسىم خوڭكوڭدا كۆرگەزمىگە قويۇلغاندىن كېيىن، خىتاي ۋە چەتئەل جامائەتچىلىكىنىڭ كۈچلۈك دىققىتىنى تارتقان.
فرانسىيە ئاخبارات ئاگېنتلىقىنىڭ خەۋەر قىلىشىچە، ئەي ۋېيۋېي بۇ رەسىمى ئارقىلىق خىتايدىكى يېمەك-ئىچمەك بىخەتەرلىك مەسىلىسىنىڭ جىددىيلىكىنى ئوتتۇرىغا قويغان.
ئەي ۋېيۋېي بۇ ئەسىرى ھەققىدىكى باياناتىدا، خىتايدا يېمەك-ئىچمەك بىخەتەرلىكىنى تۈپ يىلتىزىدىن ھەل قىلىدىغان بىر مېخانىزمنىڭ تېخى قۇرۇلمىغانلىقىنى، بۇ ئەھۋالنىڭ خىتاي ئەۋلادلىرىنىڭ بىخەتەر ئۆسۈپ يېتىلىشىگە ئېغىر تەھدىت شەكىللەندۈرگەنلىكىنى بايان قىلغان.
خىتايدا 2008-يىلى سۈت پاراشوكى ۋەقەسى يۈز بەرگەن؛ ۋەقەدە 6 بوۋاق سۈپەتسىز سۈت پاراشوكىدىن زەھەرلىنىپ ئۆلگەن؛ 300 مىڭدىن ئارتۇق بالىلارنىڭ سۈپەتسىز سۈت پاراشوكىدىن زەھەرلەنگەنلىكى ۋە ئۇلارنىڭ بىر قىسىمنىڭ بۆرىكىگە تاش چۈشكەنلىكى ئاشكارىلانغان.