Yawropa parlamént ezaliri firansiyening xitay bilen bolghan jinayetchi almashturush kélishimini tonglitishni telep qildi

Yawropa parlaméntining 5 neper ezasi 28-aprél firansiyening yawropa ittipaqida da'imiy turushluq wekili filip léglis kostagha xet yézip, fransiyening xitay bilen bolghan jinayetchi almashturush kélishimini tonglitishni telep qilghan. Bu xetni yawropa parlaméntining en'gin er'oghlu, miriyam lékisman, réhinxart bütikofér, rafa'él glukisman, anna fotiga qatarliq ezaliri yazghan.

Ular xétide, xitayning xongkong bixeterlik qanuni maqullap, xongkongning alahide ornigha we xitay-en'gliye qoshma axbaratigha buzghunchiliq qilghanliqi, firansiyening bu tereqqiyatni nezerde tutup, xitay bilen imzalighan jinayetchi almashturush kélishimini toxtitishini ümid qilidighanliqini bildürgen.

Ularning xétide yene: “Yawropa parlaméntining 2020-yili 17-dékabir maqullan'ghan shinjangdiki Uyghurlarning weziyiti heqqidiki qarari, shuningdek 2021-yili 21-yanwarda maqullighan xongkong öktichilirining basturulushi heqqidiki qararida biz yawropa ittipaqigha eza bezi döletlerning we bashqa xelq'ara shériklirimizning xitay bilen bolghan jinayetchi almashturush kélishimlirini qarshi alghan shundaqla bashqa eza döletlerni buninggha egishishke chaqirghan. Biz Uyghurlarning, xongkong girazhdanlirining tibet yaki yawropadiki xitay öktichilirining ( xitaygha) qayturulushining aldini élishimiz kérek” déyilgen.

Ularning agahlandurushiche, eger bu kishiler xitaygha qayturulsa siyasiy sotlash, qiyin-qistaq, uzun yilliq qamaq qazasi, hetta ölüm jazasigha uchraydiken. Ular xétide firansiyening weziyetni qayta mölcherlep, xitaygha qayturushni toxtitishi, yawropaning ortaq qimmet ölchimige emel qilipla qalmay, xongkongluqlar, Uyghurlar, tibetler we yawropani makan tutqan xitay démokratlirigha hemdemde bolushini telep qilghan.