Американиң уйғур мәҗбурий әмгикини чәкләш тәдбирлири үнүм көрсиәтмәктә

Мухбиримиз ирадә
2021.07.20

Америка һөкүмитиниң хитайниң уйғурларға қаратқан мәҗбурий әмгикини аяқлаштуруш йолида көрситиватқан тиришчанлиқлири нәтиҗә бәрмәктә.  

20- Июл күни, “вол- ситрит жорнили” гезитиниң хәвәр қилишичә, американиң уйғурларниң мәҗбурий әмгикидин пайдилиниватқан ширкәтләргә қаратқан тәкшүрүшни чиңитиши вә җаза тәдбири елан қилиши нәтиҗисидә һазир хитайниң алма ширкити вә найк ширкәтлиригә мал тәминләйдиған завутлири уйғур ишчиларни ишлитиштин өзини елип қачидиған болуп қалған.

Хәвәрдә көрситилишичә, алма вә башқа ширкәтләрни әқлий иқтидарлиқ сезимчан екран билән тәминләп кәлгән “хитай линза техника чәклик ширкити” ниң әтрапидики дукандарлар вә бир әһвалдин хәвәрдар киши өткән йили дөләт қоллишидики әмгәк программиси арқилиқ уйғур елидин йөткәп келингән уйғур завут ишчилириниң тохтитилғанлиқини ейтип бәргән. Һазир шу завутта ишләйдиған бириму бу ширкәтниң нөвәттә уйғур ишчилирини ишлитишни тохтатқанлиқини ейтқан.

Йәнә маска ишләп чиқиридиған вә маскилири американиң бир тор сәһиписидиму сетилидиған “хубей хәйшин сәһийә мәһсулатлири горуһи чәклик ширкити” му уйғур елидин кәлгән ишчиларни ишлитишни тохтатқан. Бир хизмәтчи мухбирларға “ширкәт өткән йили 9-айда шинҗаңлиқ ишичиларниң тохтамини узартмаслиқни қарар қилди,” дегән.

Хитайдики найк маркиси үчүн аяқ ишләп чиқиридиған “Taekwang” санаәт чәклик ширкитиниң хитайдики тармақ ширкити бултурниң иккинчи пәслидә уйғур елидин кәлгән ишчиларни өйлиригә қайтурувәткән.

“вол-ситрет жорнили” гезитиниң хәвиридә көрситилишичә, хитайдики тәминләш зәнҗирлириниң уйғур ишчиларни ишлитиштин тохтитиши америка қатарлиқ ғәрб дөләтлири қойған чәклимиләрниң хитай ширкәтлиригә һәқиқәтән бесим пәйда қиливатқанлиқини намайән қилип беридикән. Болупму буниңда башламчи рол ойнаватқан американиң уйғур мәҗбурий әмгикигә четишлиқ болған пахта, пәмидур вә полисиликон (көк таш) ни импорт қилишни чәклиши, нурғунлиған дөләт һалқиған хәлқаралиқ ширкәтләрни хитайдики тәминләш зәнҗирини тәптиш қилишқа, қайта тәшкилләшкә вә тәкшүрүш елип беришқа мәҗбурлиған икән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.