Xelq'ara olimpék komitétining mu'awin re'isi Uyghur mejburiy emgiki mesilisige chétishliq iken

Ixtiyariy muxbirimiz jewlan
2021.08.09

Pütün dunyada kishilik hoquq mesilisige köngül bölüwatqan döletler, hökümetsiz teshkilatlar we siyasiy erbablar kéler yili ötküzüsh pilanlan'ghan béyjing qishliq olimpék musabiqisini bayqut qilish, uni bashqa döletke yötkesh chaqiriqi qiliwatqan bu künlerde, xelq'ara olimpék komitétining mu'awin re'isi, 2022-yilliq béyjing qishliq olimpék musabiqisini teshkillesh komitétining re'isi xu'an antoniyo samaranch salisachs bu musabiqini xitayda ötküzüsh meydanida ching turmaqta iken.

 Yaxu torida élan qilin'ghan bir xewerde éytilishiche, salisachsning bashqurushidiki tenterbiye xeyr-saxawet orgini samaranch fondi xitaydiki anta shirkitining yardimige érishken. Tenterbiye kiyimliri ishlepchiqiridighan anta shirkiti Uyghur rayonidiki mejburiy emgek mesilisini qilche nezerge almay, shinjang paxtisini dawamliq ishlitiwatqan shirketlerning birsi iken. Samaranch fondi 2012-yil qurulghandin buyan izchil halda anta shirkitining iqtisadiy yardimige ériship kelgen. Salisachs 2016-yili xelq'ara olimpék komitétining mu'awin re'isi bolghandin kéyin anta shirkitimu olimpék komitétining qollishigha érishken. Mezkur komitét anta shirkitini bu yil ötküzülüwatqan tokyo yazliq olimpék musabiqisi we kéler yildiki béyjing qishliq olimpék musabiqisini ötküzüshke mes'ul olimpék komitéti emeldarlirini kiyim bilen teminleydighan shirket dep élan qilghan.

Xewerde körsitilishiche, xu'an antoniyo samaranch salisachs xelq'ara olimpék komitétining sabiq re'isi samaranchning oghli bolup, sabiq re'is samaranch bolsa 2008-yil xitayning olimpék musabiqisi ötküzüshige töhpe qoshqan shexs iken. Salisachs dadisining yoligha warisliq qilip, ta hazirghiche xitay bilen yéqin munasiwet ornitip kelgen. U xitaydiki anta shirkitidin bashqa yene mejburiy emgekke chétishliqi bolghan köpligen shirketler bilen shérikleshken bolup, xelq'aradiki kishilik hoquq organlirining chaqiriqlirigha qulaq salmay kelgen. 2020-Yili u kishilik hoquq pa'aliyetchliri bilen ötküzgen bir yighinda, béyjing qishliq olimpék musabiqisini bashqa jaygha yötkesh teklipini ret qilghan.

Kishilik hoquq közetchilirining qarishiche, salisachsning “Shinjangda mejburiy emgek mesilisi yoq” dep qaraydighan xitay shirketliri we xelq'ara shirketler bilen hemkarlishishi xelq'ara olimpék rohigha xilap qilmish hésablinidiken. Uning bu xil qilmishlirining ashkarilinishi, amérika dölet mejlisidiki ikki partiyening téximu birliship, bu musabiqini bayqut qilishini ilgiri süridiken.

    

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.