Donald tramp: "Shi jinping G-20 yighinigha kelmise bajning sanini téximu ashurimen!"

Muxbirimiz eziz
2019-06-11
Élxet
Pikir
Share
Print

Amérika bilen xitay otturisidiki soda urushining yuqiri pellige chiqishigha egiship, amérika prézidénti donald tramp 10-iyun küni xitay mallirigha qoyulidighan tamozhna béjining sanini téximu ashuridighanliqini bildürdi.

U buningdin ilgirirek bu heqtiki söhbet jeryanida "Xitay bilen bolghan soda söhbitide birlikke kélelmisek tamozhna béjini 300 milyard dollargha östürimiz" dégenidi.

Roytérs agéntliqining 11-iyundiki xewiride éytilishiche, donald tramp 28-iyun küni yaponiyening osaka shehiride échilidighan G-20 yighinigha qatnishidighan bolup, bu yighin'gha amérika qatarliq 19 dölet we yawropa ittipaqining rehberliri qatnishidiken. U bu heqte muxbirlarning so'allirigha jawab bérip: "Shi jinping bilen könglimiz yéqin. Eger u bu qétimqi yighin'gha kelmise xitay malliridin élinidighan tamozhna béjining sanini ashurimen" dégen. Melum bolushiche, hazir amérika import qiliwatqan xitay mallirigha 35-40 pirsent tamozhna béji qoyuluwatqan bolup, ikki terep axirqi kélishimge kélelmise yene 60 pirsent bajning qoshulushi éniq iken.

"Jenubiy xitay seheri géziti" ning 11-iyun sanida élan qilin'ghan bu heqtiki maqalida körsitilishiche, bu qétimqi soda urushi ötken yigirme-ottuz yil mabeynide "Dunya iqtisadida yéngidin bash kötürgen küch" dep teriplinip kéliwatqan xitay iqtisadining qaysi derijidiki "Küchlük" likini roshen namayan qilghan: xitay döliti bir bolsa amérikaning buyruqlirini yawashliq bilen orundishi, bir bolsa buni ret qilip özlirining "Asta tereqqiyat" liniyesige chüshüshi zörür bolup qalghan. Bolupmu xu'awéy qatarliq bir qatar chong shirketlerning amérikaning téxnikaliri bolmighanda birdinla aqsap qélishi xitay iqtisadidiki ajizliqlarni téximu éniq körsetken. Bu hal dölet mudapi'esi, mashinisazliq sana'iti, awi'atsiye sana'iti qatarliq köpligen sahelerde oxshash iken.

Maqalida körsitilishiche, ilgiri kishiler "Xitay özining köp tereplime alahidilikliri bilen amérikaning soda urushi arqiliq bésim qilishigha taqabil turup kételeydu" dep qarap kelgen. Emma xitaydiki eng chong shirket bolghan xu'awéyning teqdiri kishilerning bu ümidining quruq köpüktin bashqa nerse emeslikini ispatlighan. Aptor mushu ehwallargha asasen "Xitaygha amérikining shertlirini qobul qilishtin bashqa chiqish yoli yoq" dep alahide körsitidu.

Toluq bet