Hindonéziye prézidénti jow baydén bilen shi jinpingning G-20 bashliqlar yighinigha qatnishidighanliqini bildürgen

Hindinoziye prézidénti jokowi amérika prézidénti jow bayén bilen xitay rehbiri shi jinpingning 15- we 16-noyabir künliri hindonéziyening bali shehiride ötküzülidighan G-20 döletlirining bashliqlar yighinigha qatnishidighanliqini élan qilghan.

Jokowining bildürüshiche, jow baydén bilen shi jinpingni öz ichige alghan 17 döletning rehbiri bu yighin'gha qatnishidighanliqini delilligen. Lékin rusiye prézidénti putin bilen ukra'ina prézidénti zélénsiky téxiche özlirining bu yighin'gha qaynishidighan-qatnashmaydighanliqini mu'eyyenleshtürmigen. “Blumbérg xewerliri” agéntliqining bildürüshiche, prézidnét jokowi putin bilen zéléniskiy her ikkisining “Eger weziyet yol qoysa, qatnishishimiz mumkin” dégenlikini éytqan.

Halbuki, aqsaray bilen jongnenxey prézidént baydén bilen shi jinpingning bu yighin'gha qatnashsa, ayrim halda yüz turane uchrishidighan yaki uchrashmaydighanliqi toghrisida hazirghiche héchqandaq bayanda bolup baqmidi. “Jenubiy xitay etigenlik pochtisi” gézitining 8-noyabir bergen xewiride éytilishiche, nöwette ikki terep baydén bilen shi ning yüz turane uchrishishi toghrisida sözlishiwatqan bolsimu, lékin hazirqi basquchta her ikkila terep buni ashkara élan qilishni xalimaydiken.

Eger baydén bilen shi jinping balida uchrashsa, bu amérika prézidéntining wezipige olturghan az kem 2 yildin béri tunji qétim uning bilen yüz turane uchrishishi bolup hésablinidiken.

Melum bolushiche, eger ikki terep amérika jumhuriyetchi kéngesh palata ezasi josh xawléy shi jinpingning Uyghur irqiy qirghinchiliqidiki mes'uliyitini jawabkarliqqa tartish toghrisida qanun teklip layihesi sun'ghan bir waqitta yüz turane körüshse, bezi dölet mejlisi ezalirining prézidént baydén'gha Uyghur irqiy qirghinchiliqini toxtitishni telep qilish toghrisida bésim ishlitish mumkinchiliki bar iken. Halbuki, “Jenubiy xitay etigenlik pochtisi”, ikki terep yuzturane körshken teqdirdimu, bu ikki dölet arisidiki mewjut halette tüp özgirish peyda qilmaydighanliqini éytqan.