Gérmaniye shirketliri xitaydin chékinip chiqalamdu?

“Gérmaniye dolqunliri” ning 26-awghusttiki xewiride éytilishiche, gérmaniye hökümiti 2023-yili özlirining lingship qalghan iqtisadini güllendürüsh üchün asasliq xam eshya, tawar we bashqa zapchaslarda xitaygha éghir derijide tayinip qalghanliqini étirap qilghanidi. Shunga tengsiz riqabet we “Dunyadiki ikkinchi zor iqtisadiy gewde” dep qariliwatqan xitaydin ajrilip chiqish heqqidiki chuqanlargha qarimastin 2023-yili iyulda “Xitay heqqidiki istratégiye” ni élan qilghan bolup, sabiq gérmaniye rehbiri olaf shultz (Olaf Scholz) bu heqte toxtilip “Buningdiki meqset xitay bilen bolghan baghlinishimizni biraqla üzüp tashlash emes” dégen.

Shuningdin buyanqi xelq'araliq chuqanlar gérmaniyeni xitaygha unchiwala “Bashchilap kirmeslik” ke dewet qiliwatqan bolsimu “Gérmaniye fédératip bankisi” yéqinda élan qilghan sanliq melumatlar hazirqi maliye sür'iti dawam qilsa gérmaniyening xitaygha salghan biwasite meblighining 2024-yili bir hesse ashidighanliqini körsetken. Iqtisad penliri piroféssori doris fishér (Doris Fischer) bu heqte toxtilip “Aptomobil we ximiyewi mehsulatlar sahesi buningdiki eng zor tarmaqlar” dep körsetken.

Xewerde éytilishiche, gérmaniye ishlepchiqarghan aptomobillarning üchtin biri xitayda sétilidiken. 2023-Yilining özidila gérmaniye 15 milyard amérika dolliriliq aptomobil we 11 milyard amérika dolliriliq aptomobil zapchaslirini xitaygha mangdurghan. Roytérs agéntliqi ray sinighan 566 shirketning yérimidin köpreki özlirining xitaygha salidighan meblighini köpeytish arzusida ikenlikini bildürgen. Obzorda mushu ehwal eskertilip “Eyni waqitta yawropa erzan bahaliq xam eshyada pütünley rusiyege tayinip kelgen. Ukra'inadiki urushtin kéyin yawropa buning derdini tartip kéliwatidu. Xitaygha kelgende gérmaniye xuddi shundaq xataliqni qayta sadir qiliwatidu” dep xulase chiqiridu.