Германийәдә шопур мусулман йолучини елишни рәт қилғанлиқи үчүн җазаланған

Мухбиримиз җүмә
2017.04.15


Германийәлик бир аптобус шопури йүзини ориған мусулман йолучини елишни рәт қилғанлиқи үчүн җазаға тартилмақчи.

Германийәдин чиқидиған “локал” гезитиниң хәвәр қилишичә, һадисә германийәниң нидерсаксин өлкиси әмдән шәһиридә йеқинда йүз бәргән.

Өлкилик сақчи баянатчисиниң пәйшәнбә күни ахбаратқа ашкарилишичә, нөвәттә даириләр мәзкур аптобус шопури үстидин тәкшүрүшүш елип бериливатқан болуп, бәлким униңға 10 миң явро җәриманә қоюлушиму мумкин икән.

Хәвәргә қариғанда, аптобусқа чиқирилмиған мусулман аял еғираяғ болуп, у, һиҗаб кийгәндин башқа йүзигиму ниқаб тартқа икән. Кейин йолучи аялниң ери шопур үстидин сақчиға әрз сунған.

Нөвәттә әмдән шәһәр даирилири мәзкур шопурини яллиған ширкәт билән алақә қилған болуп, ширкәт шопуриниң мусулман аялни елишни рәт қилиш арқилиқ йәрлик түзүмләргә хилаплиқ қилғанлиқини тән алған.

Хәвәрдә нәқил қилишичә, әмдән шәһириниң хадими тәммо поппенгниң ейтқанлиридин нәқил елип көрситишичә, у мундақ дегән: “бу хил қилмишларниң садир болушиға йол қоюшқа болмайду һәмдә бундақ ишлар қәтий йүз бәрмәслики керәк.”

Йеқинқи бир нәччә йилдин буян германийәни өз ичигә алған явропа әллиридә мусулман көчмәнләрниң көпийишкә әгишип, бу дөләтләрдә мусулманларға яман көздә қараш хаһишлириму күчийишкә башлиған.

Униңдин башқа өткән йили декабир берлинда йүз бәргән аптомобил террорлуқ һуҗуминиң тунистин кәлгән бир панаһлиқ тилигүчи мсулман тәрипидин елип берилғанлиқиму германийәдә мусулманларға болған сәзгүрлүкни ашурувәткән иди.

Һалбуки, германийәдә мусулманларниң диний паалийәтләр билән әркин шуғуллиниши чәкләнгән әмәс.

Көзәткүчләрниң қаришичә, мәзкур һадисә гәрчә аддийдәк көрүнсиму, әмма буниңдин һәқиқий қанун билән идарә қилинидиған дөләтләрдә һәрқандақ адәмниң қануний һоқуқиниң капаләткә игә қилинидиғанлиқини рошән көрүвалғили болидикән.

Бу һәқтә тохталған америка уйғур бирләшмисиниң рәиси илшат һәсән мундақ деди: “қанун пуқраларниң тәбиий һоқуқлирини боғушни әмәс, бәлки қоғдашни мәқсәт қилған болуши керәк. Германийәдә йүз бәргән бу кичиккинә бир вәқә уйғур мусулманлириға охшаш барлиқ һоқуқлири қатмуқат чәклиниватқан хәқләрниң диққитини тартиду әлвәттә. Нөвәттә уйғурлар өз ана вәтинидә кәмситишкә учримақта.”

Хитай һөкүмити уйғурларниң диний етиқад әркинликини чәкләпла қалмай, диний йосунда кийинишниму “җинайәт” қатариға киргүзгән вә диний йосунда кейингә кишиләрни аммиви қатнаш васитилиридин тосқанниң үстигә, уларниң һөкүмәт орунлири, дохтурхана вә кутупханиларға киришиниму мәни қилған иди.


Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.