Gérmaniyede shopur musulman yoluchini élishni ret qilghanliqi üchün jazalan'ghan

Muxbirimiz jüme
2017.04.15
Share on WhatsApp
Share on WhatsApp


Gérmaniyelik bir aptobus shopuri yüzini orighan musulman yoluchini élishni ret qilghanliqi üchün jazagha tartilmaqchi.

Gérmaniyedin chiqidighan “Lokal” gézitining xewer qilishiche, hadise gérmaniyening nidérsaksin ölkisi emden shehiride yéqinda yüz bergen.

Ölkilik saqchi bayanatchisining peyshenbe küni axbaratqa ashkarilishiche, nöwette da'iriler mezkur aptobus shopuri üstidin tekshürüshüsh élip bériliwatqan bolup, belkim uninggha 10 ming yawro jerimane qoyulushimu mumkin iken.

Xewerge qarighanda, aptobusqa chiqirilmighan musulman ayal éghir'ayagh bolup, u, hijab kiygendin bashqa yüzigimu niqab tartqa iken. Kéyin yoluchi ayalning éri shopur üstidin saqchigha erz sun'ghan.

Nöwette emden sheher da'iriliri mezkur shopurini yallighan shirket bilen alaqe qilghan bolup, shirket shopurining musulman ayalni élishni ret qilish arqiliq yerlik tüzümlerge xilapliq qilghanliqini ten alghan.

Xewerde neqil qilishiche, emden shehirining xadimi temmo poppén'gning éytqanliridin neqil élip körsitishiche, u mundaq dégen: “Bu xil qilmishlarning sadir bolushigha yol qoyushqa bolmaydu hemde bundaq ishlar qet'iy yüz bermesliki kérek.”

Yéqinqi bir nechche yildin buyan gérmaniyeni öz ichige alghan yawropa elliride musulman köchmenlerning köpiyishke egiship, bu döletlerde musulmanlargha yaman közde qarash xahishlirimu küchiyishke bashlighan.

Uningdin bashqa ötken yili dékabir bérlinda yüz bergen aptomobil térrorluq hujumining tunistin kelgen bir panahliq tiligüchi msulman teripidin élip bérilghanliqimu gérmaniyede musulmanlargha bolghan sezgürlükni ashuruwetken idi.

Halbuki, gérmaniyede musulmanlarning diniy pa'aliyetler bilen erkin shughullinishi cheklen'gen emes.

Közetküchlerning qarishiche, mezkur hadise gerche addiydek körünsimu, emma buningdin heqiqiy qanun bilen idare qilinidighan döletlerde herqandaq ademning qanuniy hoquqining kapaletke ige qilinidighanliqini roshen körüwalghili bolidiken.

Bu heqte toxtalghan amérika Uyghur birleshmisining re'isi ilshat hesen mundaq dédi: “Qanun puqralarning tebi'iy hoquqlirini boghushni emes, belki qoghdashni meqset qilghan bolushi kérek. Gérmaniyede yüz bergen bu kichikkine bir weqe Uyghur musulmanlirigha oxshash barliq hoquqliri qatmuqat chekliniwatqan xeqlerning diqqitini tartidu elwette. Nöwette Uyghurlar öz ana wetinide kemsitishke uchrimaqta.”

Xitay hökümiti Uyghurlarning diniy étiqad erkinlikini cheklepla qalmay, diniy yosunda kiyinishnimu “Jinayet” qatarigha kirgüzgen we diniy yosunda kéyin'ge kishilerni ammiwi qatnash wasitiliridin tosqanning üstige, ularning hökümet orunliri, doxturxana we kutupxanilargha kirishinimu men'i qilghan idi.


Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.