Gérmaniyening xitay bilen bolghan munasiwiti tüptin özgirishi mumkin

Gérmaniye bash ministir olaf shulzning partiyesi bolghan sotsiyal démokratlar partiyesining rehbiri lars kilingbél (Lars Klingbeil) yéqinqi bir sözide gérmaniyening xitay bilen bolghan munasiwiti tüptin özgirishi mumkin, dégen.

Roytérs agéntliqining éytishiche, u 11-yanwar charshenbe küni gérmaniyening “Waqit” (Die Zeit) gézitining ziyaritini qobul qilghanda xitay heqqide toxtilip mundaq dégen: “Biz shuni tonup yétishimiz kérekki, ete yaki uningmu etisi yaki 10 yildin kéyin, xitay öz chigraliridin halqip ötüshi mumkin. Eger xitay teywen'ge hujum qilsa, bizning xitay bilen bolghan munasiwitimiz xuddi rusiye bilen bolghandek tüptin özgirishi mumkin.”

Kilingbil sözide yene gérmaniyening xitay siyasitini tengshishi lazimliqini eskertken we “Gérmaniye choqum xitaydin ayrilishni kücheytishi, bashqa bazarlarni échishi we xam eshya sodisi üchün bashqa shériklerni tépishi kérek. Bizning rusiye bilen bolghan munasiwitimiz bizge chong sawaq bolushi kérek” dégen.

Xewerdin qarighanda, gérmaniye nöwette xitay bilen bolghan munasiwetlerge sezgürlük bilen mu'amile qilidighan we iqtisadiy tayinishni azaytishni meqset qilidighan yéngi xitay istratégiyesini tetqiq qiliwatqan bolup, bérlinning yéngi xitay istratégiyesi pilani gérmaniyening sabiq bash ministiri an'géla mérkélning xitay siyasiti dewrining axirlashqanliqidin dérek béridiken. An'géla merkél dewride xitay gérmaniyening eng zor tijaret shérikige aylan'ghan idi.

Roytérs agéntliqining éytishiche, yéqinqi yillardin buyan, gérmaniye siyasiyonliri we soda rehberliri arisida asiya bilen bolghan sodida köp xillishishni teshebbus qilidighanlar köpeymektiken.