Германийә һөкүмити хитайға нисбәтән “қаттиқ” мәйданға өтмәктә

Мухбиримиз әзиз
2022.02.15
Share on WhatsApp
Share on WhatsApp

Йиллардин бери хитайға нисбәтән “юмшақ” мәвқәдә болуп келиватқан германийә һөкүмитиниң нөвәттә бу әндизигә хатимә берип, хитайға нисбәтән техиму қаттиқ мәйданға өтүватқанлиқи көпләп мәлум болмақта.

“японийә иқтисад хәвәрлири” (Nikkei) ниң 12-февралдики мулаһизә мақалисидә ейтилишичә, германийә ташқий ишлар министирлики йеқинда башқа министирликләргә уқтуруш йоллап, уларни хитайни “системилиқ рәқиб” дәп тонушқа дәвәт қилған. Олаф шулз һөкүмити йолға қойған бу омумий истратегийә сабиқ баш министир анҗела меркел иҗра қилип келиватқан “қаршилашмаслиқ” истратегийәсидин зор дәриҗидә пәрқ қилидикән.

Мақалидә ейтилишичә, германийә һөкүмитиниң бу хил йеңи мәйдани, болупму униңдики уйғур диярида әвҗ еливатқан мәҗбурий әмгәк вә лагер системиси, тәйвән боғузи мәсилиси қатарлиқлардики өзгиришләр хитай һөкүмитини бәкму биарам қилған. Мәлум болушичә, германийә йеңи нөвәтлик һөкүмитиниң бундақ мәвқәгә өтүши, явропа иттипақиниң хитай һәққидики мәвқәсидә көрүлүватқан өзгиришкә мас һалда оттуриға чиққан һадисә икән. Германийә йешиллар партийәсиниң әзаси рейнхард бутикофер бу һәқтә сөз қилип: “бирнәччә йилни өткүзүветип болсиму, германийә һөкүмити ахири хитай билән бизниң оттуримиздики системилиқ риқабәтни көрситип өтүшкә мувәппәқ болалиди” дегән.

Мақалидә көрситилшиичә, анҗела маркел баш министир болған 16 йил җәрянида германийә һөкүмити изчил “хитай билән қаршилашмаслиқ” мәвқәсидә туруп кәлгән. Буниңдики әң муһим сәвәб иқтисад амили болуп, хитай изчил түрдә германийәниң иккинчи орундики екиспорт базири болуп кәлгән. Бу мәзгилдә оттура һесап билән германийә ишләпчиқарған һәр үч аптомобилниң бири хитайда сетилған. 2021-Йили германийәниң хитайға қилған екиспорт содисиниң қиммити 114 милярд америка доллириға йәткән.

Германийә һөкүмитиниң бу йеңи мәвқәси уларниң бейҗиң қишлиқ олимпик мусабиқисиға өз вәкиллирини әвәтмәсликидиму әкс әткән болуп, нөвәттә уларниң һиндистан вә японийә билән мунасивитиму һәмкарлиқ йөнилишигә қарап маңмақта икән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.