Kishilik hoquqni közitish teshkilati gérmaniyini xitay bilen ötküzidighan söhbitining mezmunlirini ashkarilashqa chaqirdi

Gérmaniye bilen xitay arisida her yili bir qétim ötküzülüwatqan “Döletni qanun arqiliq idare qilish söhbiti” bashlinish aldida turmaqta. Kishilik hoquqni közitish teshkilati bu munasiwet bilen bayanat élan qilip, gérmaniye hökümitini söhbetning mezmunlirini ochuq élan qilishqa chaqirdi.

Teshkilat bayanatida, gérmaniye we bashqa gherb döletliri xitay bilen her yili dégüdek “Kishilik hoquq” we “Döletni qanun boyiche idare qilish” söhbet yighinlirini ötküzüwatqan bolsimu, emma buning ünüm bermeywatqanliqini, hetta xitay hökümitining bu döletlerge bésim ishlitip söhbetning mezmunini ashkarilashqimu yol qoymaywatqanliqini bildürgen. Uningda mundaq déyilgen:
‏-Gérmaniye eger bu qétimliq söhbette azraq bolsimu netijige érishimen dése, choqum aldi bilen söhbetke xitaydiki ijtima'iy teshkilatlarning wekillirini teklip qilip qatnashturushi, söhbette otturigha qoyulghan mesililerni, pikir-tekliplerni axbaratqa birmu-bir ashkarilishi kérek. Gérmaniye shundaqla xitay hökümitige we xitay xelqige kishilik hoquq mesilisining gérmaniye diplomatiyisining yadrosi ikenlikini tekitlishi kérek.

Kishilik hoquqni közitish teshkilati bayanatida, shi jinping hakimiyet béshigha kelgendin buyan xitayda puqralarning puqraliq hoquqi, kishilik hoquqi, uchur-axbarat, pikir erkinliki weziyitining hessilep nacharlap ketkenlikini, türmige qamalghan zhurnalist, yazghuchi, öktichilerge oxshash wijdan mehbusliri sanining éship ketkenlikini, Uyghur éli we tibetlerge yürgüzüwatqan qattiq qolluq siyasetlirining ilgirikidinmu küchlinip ketkenlikini bayan qilghan.