Ghulja nahiyeside besh ming déhqan-charwichi bu nahiyediki toqumichiliq baghchisining “Emgek küchliri” ge aylandurulghan

Xitay hökümiti Uyghur rayonida mejburiy emgekning mewjutluqini ret qiliwatqan bir peytte, ghulja nahiyeside besh ming déhqan-charwichining bu nahiyediki bir toqumichiliq baghchisining emgek küchlirige aylandurulghanliqi melum boldi. Hazir amérikada yashawatqan lagér shahitliridin gülzire awulqan ghulja nahiyesidiki mezkur toqumichiliq sana'et baghchisida mejburiy emgek küchlirining ishleydighanliqi, özining ilgiri bu sana'et baghchisidiki ili jowen kiyim-kéchek shirkitining peley zawutida mejburiy emgekke sélin'ghanliqini ilgiri sürgen. “Xitay xewerliri tori” ning 22-séntebir bergen xewiride ashkarilishiche, ghulja nahiyesige jaylashqan 20 kiwadrat kilométirliq bir toqumichiliq baghchisida ölchemlik zawut binalirining qurulushigha egiship, 5000 din artuq yerlik déhqan-charwichi sana'et ishchisigha aylandurulghan.

“Xitay xewerliri tori” ning xewiride, hökümet bilen hemkarliship, Uyghurlarni mejburiy emgekke sélish bilen eyiblinip kelgen “Jowen kiyim-kéchek shirkiti” ning 20 kiwadrat kilométirliq mezkur sana'et baghchisigha jaylashqanliqi, bu shirketning zawutida tére peley, yung peley we bashqa rext peleylerni shimaliy yawropa, rusiye, polsha, ottura asiya we bashqa dölet-rayonlargha éksport qilidighanliqi éytilghan. “Xitay xewerliri tori” ning qeyt qilishiche, ghulja nahiyesidiki mezkur toqumichiliq baghchisi jyangsu nentong guruhining shinjanggha nishanliq yardem bérish türige asasen qurulghan bolup, bu sana'et baghchisi Uyghur rayonidiki “Toqumichiliq mashinisining kölimi eng chong, emgek küchliri eng köp ishqa orunlashqan, marka ünümi eng yaxshi sana'et baghchisi” iken.

“Xitay xewerliri tori” ning 22-séntebir bergen resimlik xewiride zawut ishchilirining hemmisining Uyghurlardin bolushi, zawutta birmu xitay ishchining bolmasliqi diqqet qozghimaqta. Melum bolushiche, amérika soda ministirliqi ilgiri “Jowen kiyim-kéchek shirkiti” ni xitay hökümitining mejburiy emgek pirogrammisigha qatniship, lagér tutqunlirini özining peley zawutida emgekke salghanliqi seweblik qara tizimlikke kirgüzgen.