Silowakiye gu'entanamo türmisidiki axirqi 3 Uyghurni qobul qildi

Amérika dölet mudapi'e ministirliqining seyshenbe küni ashkarilishiche, gu'entanamoda qélip qalghan axirqi 3 Uyghur qoyup bérilip silowakiyege yolgha sélin'ghan.

Dölet mudapi'e ministirliqi bayanatchisi jon kirbi bayanatida, bu yötkesh we orunlashturush bizning gu'entanamo tutqunlar lagérini taqash yolidiki muhim burulush nuqtilirimizning biri, dep körsitip, lagérda 2001‏-yili afghanistanda esir élin'ghan Uyghur tutqunlardin héchqandaq kishi qalmighanliqini élan qildi.

Amérika hökümiti afghanistanda esir élin'ghan 22 neper Uyghurning “Xata waqitta, xata yerde turup qalghanliqi” ni ilgiri sürüp, ularning térrorchi emeslikini élan qilghan bolsimu, biraq axirqi türküm Uyghurlarni bashqa döletke orunlashturup bolushqa 10 yildin artuq waqit ketti.

“Washin'gton pochtisi géziti” ning ashkarilishiche, yüsüp abbas, seydulla xaliq, haji ekber abdulghopur silowakiyege bérip orunlishishni öz ixtiyarliqi bilen qobul qilghan. Bayanatchi jon kirbi, silowakiyening “Insanperwerlik körsitip”, bu Uyghurlarni qobul qilghanliqigha minnetdarliqini bildürdi.

Amérika ilgiri bir qisim Uyghurlarni ottura amérikidiki salwador we tinch okyandiki palawgha orunlashturghan. Biraq salwadordiki Uyghurlarning hemmisi, palawdiki Uyghurlarning mutleq köp qismi bashqa döletke kétip orunlashqan.