Uyghur kompozitor güldiyar tengritaghli “Eng yaxshi téléwiziye tiyatiri muzikisi” mukapatigha érishti

Tonulghan Uyghur muzikant we kompozitor güldiyar tengritaghli türkiyediki nopuzluq jem'iyetlerdin bolghan “Filim sana'iti we sen'etchilerni kücheytish fondi jem'iyiti ( Film-San) teripidin tarqitilghan “Filim we téléwiziye tiyatiri mukapati” gha érishken.

Güldiyar tengritaghli bu mukapatni téléwiziye tiyatiri muzikisi türi boyiche alghan bolup, uning “Yali chapqini” namliq qisimliq téléwiziye tiyatiri üchün ishligen muzikisi “Eng yaxshi téléwiziye tiyatiri muzikisi” bolup bahalan'ghan.

Güldiyar tengritaghli türkiyediki “Star téléwiziyesi qanili” da tarqitiliwatqan dangliq téléwiziye filimi “Yali chapqini” (Yalý Çapkýný) ning muzika kompozitori bolup, bu téléwiziye tiyatiri hem weqeliki hem artisliri hem bir-biridin lerzan muzikiliri bilen küchlük alqishqa érishken idi.

5 Yash waqtida a'ilisidikiler bilen türkiyege kélip yerleshken güldiyar kichikidin bashlap piyanino dersi élishqa bashlighan. U türkiyediki mimar sinan güzel-sen'et uniwérsitétini püttürgendin kéyin, awstriyege bérip mozart salzburg uniwérsitétining orkéstir pi'anino kespide magistirliq unwanigha érishken.

U oqush jeryanida awstriye we türkiyede nurghun konsértlarni bergen. Güldiyar awstriyede sekkiz yil oqughandin kéyin türkiyege qaytip kelgen.

Güldiyar tengritaghli hazirghiche türkiyede köpligen filim we qisimliq téléwiziye tiyatirlirining muzikilirini ishligen bolup, “Achchiq alma”, “Babam”, “Shahane hayatim” we “Yali chapqini” qatarliqlar bulardin ichidiki peqet bir qanchisi bolup hésablinidu. Uning yene “Raxmaninof anatoliyan projékti” we “Mulhem” namliq CD pilastinkilirimu türkiyede bazargha sélinip alqishqa érishken.