Лагерда йетип чиққан қәшқәр университетиниң сабиқ оқутқучиси гүлнар обул б д т да хитайниң сияситини ақлиған

Мухбиримиз әркин
2021-06-25
Share

Лагерда йетип чиққан қәшқәр университетиниң сабиқ оқутқучиси гүлнар обул 22-июн б д т кишилик һоқуқ кеңишиниң 47-нөвәтлик йиғинида хитай һөкүмитигә вакаләтән сөз қилип, хитайниң уйғур елидики сияситини ақлиған.

Хитай таратқулириниң ейтишичә, у "һәрқандақ чәт әл күчлириниң шинҗаңниң муқим вә иттипақлиқ чоң вәзийитини бузалмайдиғанлиқи" ни билдүргән. Гүлнар обул бу сөзләрни қилишниң алдида б д т кишилик һоқуқ али комиссари мишел бачилет хитайни "шнҗаңдики еғир кишилик һоқуқ дәпсәндичиликигә аит хәвәрләрни һәқиқий рәвиштә тәкшүрүшкә йол қоюш" қа чақирған иди.

Шуниң билән бир вақитта йәнә канада башчилиқидики 44 дөләт б д т кишилик һоқуқ ‍алий комиссариниң тәкшүрүш елип беришиға йол қоюшини тәләп қилған иди. Йиғинда гүлнар обул хитайниң уйғур ели вәзийитигә даир қелиплашқан чақириқлирини қайта тәкитләп: "шинҗаңниң иҗтимаий-иқтисадий вә кишилик һоқуқ тәрәққияти зор нәтиҗиләргә еришкәнлики" ни билдүргән.

У йәнә: "һазирқи вәзийәтниң муқим икәнлики, йеқинқи 4 йилдин буян районда һечқандақ терорлиқ вәқәси йүз бәрмигәнлики", "иқтисадниң юқири сүпәтлик тәрәққияти ишқа ашқанлиқи, уневерсал иқтисадий күчиниң йеңи бир пәллигә көтүрилгәнлики" ни илгири сүргән.

Бирақ у бу "тәрәққият" ниң қандақ бәдәлләргә кәлгәнликини тилға ‍алмиған. Радийомиз илгири гүлнар обулниң 2018-йили қәшқәр университетида оқутқучилиқ қиливатқан вақтида тутқун қилинип, лагерға қамалғанлиқини дәлиллигән. У кейинрәк қоюп берилгәндин кейин ‍өзиниң лагерда ятқанлиқини ‍инкар қилған шундақла ‍өткән йили уйғур аптоном районлиқ пән-техника җәмийитиниң муавин рәисиликигә йөткәп келингән иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт