Amérika tashqi ishlar ministirliqi gülshen abbasning derhal qoyup bérilishini telep qilghan

Washin'gtondin muxbirimiz uyghar teyyarlidi
2024.06.12

Amérika tashqi ishlar ministirliqi 6 yildin buyan xitay türmiside yétiwatqan gülshen abbasning derhal qoyup bérilishini telep qilghan.

Amérika tashqi ishlar ministirliqining X de élan qilghan uchurida mundaq déyilgen: “Xitay hökümitining yillardin buyan shinjangda élip bériwatqan basturushliri we wehshiylikliri  dawamlashmaqta, bu jeryanda gülshen abbasmu  6 yildin  buyan  xitay türmiside tutup turuluwatidu . Xitay da'iriliri insanperwerlik nuqtisidin bolsimu uni derhal qoyup bérishi hemde   uning a'ilisidikiler bilen jem bolushigha ruxset qilishi kérek”.

Amérika dölet mejlis ezaliridin  éwin xérin (Evin Hern) we raja kirishnamorsi (Raja Krishnamoorthi) mu gülshen abbasning derhal qoyup bérilishini telep qilghan. Amérika dölet mejlisi xitay ishliri ijra'iye komitéti  we washin'gtondiki Uyghur herikiti teshkilatimu gülshen abbas délosini qayta küntertipke élip kélip,  naheq tutulghan gülshen abbasning derhal qoyup bérilishini telep qilghan.

Radiyomizning éniqlishiche, doxtur gülshen abbas 2018-yilning axirlirida tutqun qilin'ghan bolup, xitay da'iriliri uninggha “Térrorluq herikiti teshkilleshke qatnishish, uninggha yardem qilish we ijtima'iy tertipni qalaymiqan qilish” jinayetlirini artip, 20 yilliq qamaq jazasigha höküm qilghanidi.

Melum bolghinidek, 2017-yildin buyan xitayning Uyghur diyarida élip barghan zor kölemlik tutqunida minglighan Uyghur serxilliri, shu jümlidin xalmurat ghopur, tashpolat tiyip, yalqun rozi, perhat tursun, abduqadir jalalidin, qurban mamut, rahile dawut, arslan abdulla, abliz orxun qatarliq ziyaliylar tutqun qilin'ghan we uzun muddetlik qamaq jazalirigha höküm qilin'ghanidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.