Gumada partlap ölgen saqchi bashliqi gheyret mamut xitay boyiche “Xelq qehrimani” dep békitilgen

Muxbirimiz irade
2019.09.19
Share on WhatsApp
Share on WhatsApp

2016 Yili 9-ayda gumada yüz bergen bir bomba partlash weqeside partlap ölgen, eyni chaghdiki guma nahiyelik saqchi idarisining mu'awin bashliqi gheyret mamut xitay boyiche tunji qétim tarqitilghan “Dölet sheripi” mukapatigha ériship, “Xelq qehrimani” namigha érishken.

Tengritagh torining xewiride éytilishiche, xitay dölet re'isi shi jinping jungxu'a xelq jumhuriyiti qurulghanliqining 70 yilliqini tebriklesh, xitayning qurulushi we tereqqiyatigha körünerlik töhpe qoshqan töhpikar nemunichi shexslerni teqdirlesh üchün tunji qétim “Dölet ordini” we “Dölet sheripi” mukapati tarqatqan.

Bu heqtiki xewerde gheyret mamutning guma nahiyesidiki bir “A” derijilik qachqunni qoghlawatqanda özini partlitish xaraktérlik hujumgha uchrap “Qehrimanlarche qurban bolghanliqi” qeyt qilin'ghan.

Halbuki, radiyomiz eyni chaghda gumada yüz bergen bu partlash weqesini yerlik saqchi organliridin igiligen uchurlar asasida nahayiti tepsiliy xewer qilghan. Radiyomiz igiligen uchurlarda mezkur weqening gumaning köktérek yéza 23-kentide yüz bergenliki, shu küni gheyret mamutning idaridiki bir xitay saqchi ishqa kelmigenliki üchün a'ile tekshürüshige chiqqanliqi we tuyuqsiz bayqalghan bir gumanliq weqeni tekshürüsh üchün bir öyning gemisige chüshkende bomba partlap kétip neq meydanda ölgenliki ashkarilan'ghan idi.

Chet'ellerdiki Uyghur pa'aliyetchiliridin élshat hesen ependi bu heqte toxtilip, gheyret mamutningmu emeliyette xitay hökümitining rayondiki siyasetlirining qurbani ikenlikini tekitlidi.

Diqqet qozghaydighini, gheyret mamut yene xitay boyiche “Eng güzel küresh qilghuchilar” namliq mukapatqimu namzat körsitilgen. Pütün xitay boyiche 278 shexs namzat körsitilgen bu mukapatqa Uyghur élidin 10 kishi namzat körsitilgen. Ularning ichidiki 3 nepiri Uyghur bolup, ular partlap ölgen saqchi gheyret mamut, Uyghur balilirini xitay tili we medeniyiti boyiche terbiyeligen qurban niyaz we 1950-yillarda maw zédung bilen ikki qétim körüshken qurban tulumdin ibaret iken.

Élshat hesen ependining qarishiche, yuqiriqi médallargha xitay tetqiqatchilar, pen-téxnika xadimliri bilen bir qatarda xitay hökümiti teripidin siyasiy teshwiqat matériyali boluwatqan Uyghurlarning tallinishi diqqet qozghaydighan sélishturma iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.