Gumidiki partlash weqesidin kéyin chén chüen'go qeshqerde tekshürüshte bolghan

Chén chüen'go Uyghur aptonom rayonigha partkom sékritari bolup bir ay ötmeyla gumida partlash weqesi yüz bérishi we nahiyelik saqchi idarisining mu'awin bashliqining ölüshi rayonning weziyitini yenimu jiddiyleshtüriwetken.

Shinxwa torining xewer qilishiche, gumida weqe yüz bérip ikkinchi heptisi chén chüen'go qeshqerge qarap yolgha chiqqan. U 20 - séntebir küni qeshqer wilayitidiki partiye, hökümet we armiye mes'ullirini yighip jiddiy yighin achqan. Yighinda rayonning uzaq muddetlik eminliki we muqimliqini saqlash üchün her sahediki mes'ul kishiler bilen asasiy qatlam kadirlirining eng zor derijide küch körsitishini telep qilghan.

Chén chüen'go qeshqerdiki ziyariti dawamida qeshqer shehiri etrapidiki qoghan yézisi bilen apaq xoja mazirigha bérip, u yerdiki yerlik Uyghur ahaliliri, töwen'ge chüshken kadirlar we diniy sahediki zatlar bilen körüshken. Bolupmu asasiy qatlamdiki kadirlarning muqimliq xizmiti saheside ishligen xizmetlirini közdin köchürgen.

Xewerde déyilishiche, chén chüen'go qeshqer ziyaritining axirida wilayetlik j. X. Idarisining qomandanliq merzkirige kélip saqchi terepning muqimliq boyiche teyyarlighan doklatini anglighan. U kadir - saqchilargha söz qilip, herqandaq bedel kétishidin qet'iy nezer 1 milyun 600 ming kwadrat kilométir kélidighan bu zéminni xitayning xeritiside ebediy tutup turushni qattiq tekitligen.

Közetküchiler, chén chüen'goning qeshqer sepirini guma weqesidin kéyin jenubtiki sezgür rayonlargha bérip saqchilargha yel bérishni meqset qilghan, dep qarimaqta.