Uyghur herikiti teshkilatining tor béti xitayning hujumigha uchridi

Xitay hökümitining Uyghurlargha qarita ijra qiliwatqan chégra halqighan zulum we hujumliri yéqinqi yillarda barghanséri ewjige chiqiwatqanliqi melum. Ene shu xil hujumlarning biri 3-noyabir küni Uyghur herikiti teshkilatini nishan qilghan.

Mezkur teshkilatning tor béti 3-noyabir küni namelum xakkérlarning tor hujumigha uchrighan hemde pütünley palech haletke chüshürüp qoyulghan. Shuning bilen birge tor bet yüzidiki barliq mezmunlar öchürülüp, uning ornigha xitay merkiziy hökümitining xewerliri chaplap qoyulghan. Teshkilatning ijra'iye diréktori roshen abbas bu heqte X(tiwittér) bétide uchur yollap, özlirining xitay hökümitige qarshi pa'aliyetlirining bu qétimqi tor hujumigha seweb bolghanliqini eskertken. U bu heqte toxtilip: “Xitay kompartiyesining Uyghurlarni qirghin qilishtek yawuzluqlirini pash qilghanliqimiz üchün, xitay hökümiti arqa tirek boluwatqan tor hujumigha uchriduq. Bu ularning uchurlarni basturup qoyush we kontrol qilish urunushining ipadisi” dégen.

Xitay hökümitining Uyghurlarni nishan qilghan bu xildiki chégra halqighan hujumliri toghrisida “Erkinlik sariyi”, shéfféyld uniwérsitéti, amérika dölet mejlisi qatarliq orunlar köpligen doklatlarni élan qilghan hemde guwahliq yighinliri chaqirghan idi. “Amérika-xitay istratégiyelik riqabet pewqul'adde komitéti” ning re'isi mayk gallagér yéqinda bu heqte toxtilip: “Mushuning özi emeliyette xitay hökümitining amérika qoshma shitatlirining igilik hoquqigha dexli-teruz qiliwatqanliqining ipadisi” dep körsetken idi.