"һалал" бәлгилириниң бейҗиңда союп ташлиниши күчлүк ғулғула қозғиди

Мухбиримиз әзиз
2019-07-31
Share

Буниңдин бирнәччә йил илгири уйғур диярида қәтий изчиллаштурулған "һалал" бәлгилирини йоқитиш һәрикити һазир бейҗиң шәһиридә иҗра болушқа башлиған.

Ройтерс агентлиқиниң 31-июлдики хәвиридә ейтилишичә, уларниң мухбирлири бейҗиңдики мусулманлар райони болған нюҗе кочиси вә униңға қошна җайлардики көплигән ресторан вә дуканларға есилған әрәбчә "һалал" дегән хәтләрниң союветилгәнлики яки ақ қәғәз билән көрүнмәс қилип қаплап қоюлғанлиқини көргән. Дукан хоҗайинлири болса буниң юқиридин кәлгән буйруқ икәнликини, буниң "ислам динини хитайчилаштуруш" ниң бирқисми икәнликини билдүргән. Вашингтон университетиниң лектори дәррен байлер бу һәқтә пикир қилип "бу хитай һөкүмитиниң чәтәлчә елементларни контрол қилиш қийин, дәп қариғанлиқиниң бир испати," дегән.

"оттура шәрқ көзи" гезитиниң обзорчиси, ислам вәһимисигә қарши австралийәлик паалийәтчи с. Җ. Верлемән бу һәқтә торларға учур йоллап "хитай һөкүмитиниң аталмиш әсәбийликкә қарши туруш һәрикитини мәдһийәлигән 11 мусулман дөлити хитай һөкүмитиниң әрәбчә ‹һалал' дегән хәтни мәни қилишидин номус һес қиливатқанмиду?" дегән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт