Ürümchi sheherlik teptish mehkimisi "Halalliq chüshenchisini kéngeytiwétish"ke jeng élan qildi

Muxbirimiz eziz
2018-10-09
Share

Ündidarda keng tarqalghan uchurlardin melum bolushiche, 8-öktebir küni ürümchi sheherlik teptish mehkimisi "'halalliqni kéngeytiwétish'ke qarshi qet'iy küresh qilish" chong yighini achqan.

Yighinda pütkül sheherdiki teptish sistémisida ishlewatqan Uyghur kadirlarning idé'ologiye sahesidiki küresh éngini östürüshi hemde idiyesini azad qilip "Halalliqni kéngeytiwétish"ke qarshi qet'iy küresh qilishi otturigha qoyulghan.

Xewerde éytilishiche, sheherlik teptish mehkimisi partiye guruppisining sékrétari lyu ming yighin ishtirakchilirini "Qet'iy markisizimchi-léninizimchilardin bolush", "Héchqandaq din'gha étiqad qilmasliq", "Jéni chiqip ketsimu bayriqi roshen halda 'halalliqni kéngeytish'ke qarshi turush" heqqide qesem qilishqa teshkilligen. Sheherlik teptish mehkimisining bash teptishi ilshat osman nöwette keng teshwiq qiliniwatqan "Dostum, men üchün halal réstoran izdep aware bolmang!" serlewhilik ochuq xetke imza qoyghan hemde teptish sistémisidiki kadirlarni "Pan türkizm" we "Pan islamizm" idiyelirining ziyinini chongqur tonup yétishni telep qilghan.

Yighin axirida buningdin kéyin teptish sistémisidiki barliq ishchi-xizmetchilerning birdek qet'iy ati'izimchilardin bolidighanliqi, héchqandaq diniy étiqadta bolmaydighanliqi, herqandaq jayda xitay tilida sözleydighanliqi, yémek-ichmekte halal-haram chüshenchisini tilgha almaydighanliqi otturigha qoyulghan.

Melum bolushiche, "Halalliq chüshenchisini kéngeytiwétishke qarshi turush" kürishi deslep mehsulatlardiki "Halal" dégen xetni yoqitishtin bashlan'ghan bolup, nöwette "Halal" dégen uqumni tekitleshmu men'i qilinmaqta iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet