“харвард қанун институти кишилик һоқуқ тәшәббусчилири” пирезидент байдиндин уйғурлар мәсилисини оттуриға қоюшни тәләп қилди

Вашингтондин мухбиримиз ирадә тәйярлиди
2023.11.14

Америкадики даңлиқ университетлардин болған харвард университетидики “харвард қанун институти кишилик һоқуқ тәшәббусчилири” намлиқ оқуғучилар тәшкилати 15-январ (чаршәнбә) күни америка пирезиденти җов байдинға мәктуп йоллап, уни бу қетим ши җинпиң билән көрүшкәндә уйғурлар мәсилисини оттуриға қоюшқа чақирған.

Улар пирезидент байдинға язған очуқ хетидә, өзлириниң мәктәпдиши адвокат рәйһан әсәтниң түрмидә йетиватқан иниси әкбәр әсәтниң қоюп берилиши, шундақла уйғур хәлқиниң адаләткә еришиши үчүн қиливатқан һәрикитини қоллайдиғанлиқини билдүргән һәмдә пирезидент байдинниму бу һәрикәтни қоллашқа дәвәт қилған.

Улар хетидә мундақ дегән: “сиз хитай рәиси ши җинпиң билән өткүзидиған йиғиниңизға тәйярлиқ қиливатқан мушу минутларда биз, сизниң ши җинпиңдин әкбәр әсәтни дәрһал қоюветишни тәләп қилишиңизни һәмдә бир милйондин артуқ уйғурниң халиғанчә тутуп турулушини әйиблишиңизни тәләп қилимиз. ”

Әкбәр әсәт 2016-йили 20-февралдин 15-мартқичә америка ташқи ишлар министирлиқиниң “хәлқара зиярәтчи рәһбәрләрни тәрбийәләш пирограммиси” ға қатнашқан болуп, у америкадики зияритини аяғлаштуруп үч һәптидин кейин тутқун қилинған вә 2020-йили “миллий өчмәнликкә қутратқулуқ қилиш” җинайити билән 15 йиллиқ қамақ җазасиға һөкүм қилинған. Униң америкадики һәдиси, адвокат рәйһан әсәт инисини қутулдуруш паалийәтлирини давамлаштуруп кәлмәктә.

 “харвард қанун институти кишилик һоқуқ тәшәббусчилири” байдинға язған хетидә йәнә, лагер вә түрмиләрдә тутуп турулуватқан мәһбусларниң роһий вә җисманий қийин-қистақларға учраватқанлиқини, мәҗбурий әмгәккә селиниватқанлиқини, уйғурларға қаритилған бастурушниң б д т ниң ирқий қирғинчилиқ ениқлимисиға мас келидиғанлиқи тоғрисида ортақ тонуш барлиқини әскәртип “милйонлиған адәмниң һаяти хәвпкә дуч келиватқан мушу пәйтләр дәл биз һәрикәткә өтидиған пәйттур. ” дәп язған. Улар ахирида пирезидент байдинни әкбәр әсәт вә уйғурларниң мәсилисини оттуриға қоюш арқилиқ уйғур хәлқиниң кишилик һоқуқи вә әркинликигә капаләтлик қилишқа дәвәт қилған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.