Уйғур аптоном район даирилири деһқанларни һәқсиз ишлитишни бикар қилғанлиқини елан қилди

Мухбиримиз үмидвар
2017-02-05
Елхәт
Пикир
Share
Принт

Көп йиллардин буян уйғур деһқанлириниң наразилиқлирини қозғап келиватқан һашар қатарлиқ һәқсиз әмгәккә селиш уйғур аптоном райони даирилири тәрипидин бикар қилинғанлиқи елан қилинди.

Тәңри тағ ториниң бу һәқтики учуридин мәлум болушичә, 4-феврал, уйғур аптоном районлуқ партком вә аптоном районлуқ һөкүмәт уқтуруш чиқирип, пүтүн уйғур дияри даирисидә йеза мәҗбурийәт әмгикини бикар қилғанлиқини җакарлиған.

Уқтурушта: йеза мәҗбурийәт әмгикини асас қилған барлиқ шәкилдики һәқсиз адәм ишлитишни қәтий бикар қилип, һәр қандақ орган вә орунниң деһқан-чарвичиларни һәқсиз әмгәккә селишини қәтий чәкләйдиғанлиқи билдүрүлгән.

Буниңдин башқа йәнә һәр қандақ бирәр органниң һәқсиз адәм ишлитишини чәклигәндин сирт йәнә кишиләргә һәқсиз әмгәк селиқи селиш, җәриманә төлитиш қатарлиқ усулларни қоллинишиму бирдәк чәкләнгән.

Инкас қилинишичә, илгири йеза-қишлақларда, болупму уйғур дияриниң җәнубидики йезиларда деһқанларни мәҗбурий һәқсиз әмгәккә селиш, һәқсиз әмгәккә чиқмиғанларға қарита җәриманә төлитиш яки башқа хил усулларда җаза қоллиниш әвҗи алған иди. Бу хил мәҗбури һәқсиз әмгәккә селиш кишиләрдики наразилиқ вә қаршилиқ кәйпиятини кәлтүрүп чиқиридиған амилларға айланған.

Хәвәрдин мәлум болушичә, аптоном район даирилири мәзкур қарарға хилаплиқ қилип, деһқанларни һәқсиз ишлитиш, селиқ селиш қилмиши садир қилғанларни қанун бойичә җазалайдиғанлиқини билдүргән болсиму, әмма «үнүмлүк тәдбир қоллинип, йезидики ешинча әмгәк күчлирини сиртларға чиқип ишләшкә илһамландуруш» дәп тәкитлигән.

Пикирләр (0)
Share
Толуқ бәт