Xitay hökümiti hawa kilimati söhbitide “Buzghunchiliq taktikisi ishletti” dep eyiblen'gen

Washin'gtondin muxbirimiz erkin teyyarlidi
2023.07.31

2030-Yiligha qeder zeherlik karbon gazini kontrol qilishni yuqiri chekke yetküzüshke wede bergen xitay hökümiti, nöwette yer shari kilimat söhbitide “Buzghunchiliq taktikisi” ishlitish bilen eyiblen'gen.

“Maliye waqti” gézitining xewer qilishiche, yéqinda béyjing bilen washin'gton kilimat söhbitini qayta bashlashqa kirishkendek qilghan bolsimu, lékin 20 dölet guruhining ötken hepte hindistanda ötküzülgen yer shari kilimat yighinida ixtilap tughulghan. “Maliye waqti” gézitining 28-iyul weqedin xewerdar kishilerdin neqil keltürüp bergen xewiride, xitayning yighinda zeherlik karbon gazini kontrol qilish nishanigha a'it halqiliq mesililerni muzakire qilishni ret qilip, 20 dölet guruhining kilimat yighinigha buzghunchiliq qilghanliqi bildürülgen.

Xewerde qeyt qilinishiche, xitayning bu yighindiki pozitsiyesi se'udi erebistanning qollishigha érishken. Buning bilen xitay 20 dölet guruhining bu qétimliq yighinda kömür, néfit qatarliq yéqilghulargha xatime bérip, yéshil énérgiyeni tereqqiy qildurush toghrisida kélishim hasil qilish ümidini yoqqa chiqarghan. “Maliye waqti” ning éytishiche, hindistandiki chénayda ötküzülgen bu qétimqi yighin'gha qatnashqan bireylen, “Men burun bu xil köp tereplik yighinlarda bundaq buzghunchiliq taktikisini körüp baqmighan” dégen. Bu ayning otturilirida amérika prézidéntining yer shari hawa kilimati boyiche alahide wekili jon kerriy béyjingni ziyaret qilip, xitay bilen söhbet élip barghan idi.

U söhbetning “Ijabiy” ‍ötkenlikini éytqan bolsimu, lékin yéngi hawa kilimati kélishimi hasil qilalmighanliqini bildürgen. Jon kerriyning ziyariti amérikadiki kishilik hoquq teshkilatliri we amérika dölet mejlisining bezi ezaliri xitay bilen hemkarliq élip bérish üchün “Uyghur mejburi emgikining aldini ‍élish qanuni” ni ijra qilishni boshashturushqa bolmaydighanliqi, xitayning küntaxta sana'iti Uyghur mejburi emgiki merkezleshken sahelerning biri ikenlikini agahlanduruwatqan bir waqitta élip bérilghan idi. Hindonéziyediki kilimat yighin'gha qatnashquchilarning “Maliye waqti” gézitige bildürüshiche, yighinda xitay 20 dölet guruhining iqtisadiy munber ikenliki, uning kilimat özgirishini muzakire qilmasliqi kéreklikini otturigha qoyup, karbon mehsulatlirigha soda cheklimisi qoyush teklipigimu qarshi chiqqan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.