Korla shehri bu yilmu yene “Xelq'ara herbiy ‍oyunlar musabiqisi” gha sahipxanliq qilghan

Xitay xelq'arada Uyghurlargha “Irqiy qirghinchiliq” qilish bilen eyiblinip, béyjing qishliq olimpikini bashqa döletke yötkesh telep qiliniwatqan bir waqtta, bu yilmu korla shehride “Xelq'ara herbiy oyunlar musabiqisi” gha sahipi'anliq qilghan.

2015-Yili rusiye terpidin tesis qilin'ghan we her yili istibdat döletler ishtirak qilip kelgen bu herbiy musabiqining bezi türlirini xitay her yili korla shehride ötküzüp kelmekte. Bu mezkur herbiy musabiqe türlirining 4-qétim korlada ötküzülüshi bolup, uning néme üchün her yili korlada ötküzülidighanliqi melum emes.

Biraq bezi közetküchilerning qarishiche, Uyghur élida “Irqiy qirghinchiliq” bilen eyiblinip kelgen xitayning mezkur herbiy musabiqini izchil türde korlagha orunlashturushi meqsedlik bolup, u bu arqiliq dunyagha siyasi signal bermekchi iken. 2021-Yilliq “Xelq'ara herbiy oyunlar musabiqisi” ning korla musabiqe rayonining échilish murasimi 22-awghust ötküzülgen. Uninggha rusiye, bélurusi'e, özbékistan, wénisu'éla, wéytnam qatarliq yette döletning herbiy qisimliri qatnashqan.

“Xitay xewerler agéntliqi” ning bildürüshiche, musabiqe 9-ayning 4-künige qeder dawamlishidiken. Bu jeryanda her qaysi döletlerdin kelgen herbiy qisimlar “Suworof hujumi”, “Süzük asman”, “Bixeter muhit” dep atalghan 3 türde 10 meydan herbiy oyun körsitidiken. Bu yilliq herbiy ‍oyunlar musabiqisi amérika afghanistandin esker chékindürüp chiqqan, xitay talibanlardin “Sherqiy türkistan islam herkiti” ni qollimasliqni telep qilghan waqitta ötküzülgen.