Хитайниң “Hikvision” ширкитиниң уйғурларни бастуруштики роли йәниму ениқ ашкариланған

Мухбиримиз ирадә
2022.06.16
Share on WhatsApp
Share on WhatsApp

Хитайниң көзитиш камера ширкити болған “Hikvision” ниң хитай һөкүмитиниң уйғурларға қаритиватқан бастуруш сиясити билән бивастә мунасивити барлиқи йәниму илгирилигән һалда испатланған.

Дунядики назарәт камера системилири үстидә тәтқиқат елип баридиған “IPVM” тәтқиқат ширкити 14-июн күни йеқинда ашкариланған “шинҗаң сақчи һөҗҗәтлири” дики санлиқ мәлуматларни тәтқиқ қилиш асасида бир йеңи доклат тәйярлап чиққан болуп, улар “Hikvision” ширкити камералириниң тартқан көрүнүшлириниң бәзи уйғурларниң қолға елинишини кәлтүрүп чиқарғанлиқини байқиған. Улар бу сөрәтләрни тартқан камераларниң номурлириғичә ениқлиған икән.

Доклатта көрситилишичә, “Hikvision” камераси бир уйғур әр киши һәйдәватқан аптомобилниң рәсимини тартқандин кейин, у аптомобилниң номур тахтисидики номур аптоматик һалда уйғур елидики сақчи санлиқ мәлумат амбириға әвәтилип селиштурулуп кимлики ениқлап чиқилған вә нәтиҗидә аптоматик һалда бу кишини “дәрһал қолға елиш” бәлгиси чиқирилған. Бу киши чәт әл билән мунасивәтлик, дәп қаралғанлиқи үчүн қолға елиш бәлгиси чиқирилған икән.

Доклатта көрситишичә, шинҗаң сақчи тәрәп 2018-йилға аит ички һөҗҗәтләрдила уйғур елидики 23 милйон аһалиниң учурлириниң санлиқ мәлумат амбириға киргүзүп болунғанлиқини қәйт қилған икән. Бу санлиқ мәлуматлар аталмиш “бир гәвдиләшкән бирләшмә уруш суписи” (IJOP) ға уланған болуп, аптоматик һалда шәхсләргә даир барлиқ учурларни топлап, шуниңға асасән “хәвплик” кишиләргә бәлгә қоюп маңидикән. Баш штаб болса мушу учурларға асасән кимни тутқун қилишни буйруйдикән.

“аксийос” хәвәрлириниң ейтишичә, Hikvision буниңдин илгири өз камерасиниң уйғурларни бастурушта қоллинилғанлиқидәк хәвәрләрни рәт қилип кәлгән болсиму, бу йеңи доклат чиққандин кейин бир инкас бәрмигән. Америкадики хитай әлчиханисиму җаваб бәрмигән.

Америка малийә министирлиқи 2021-йили бу ширкәтни “қара тизимлик” кә киргүзгән иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт