Аруначал райони хитай-һиндистан мунасивитидики йеңи “қизиқ нуқта” болуп қалди

Һиндистан билән хитай оттурисидики тарихий земин давасида һиндистанниң шәрқий-шималидики аруначал райони муһим орунни игиләйдиған болуп, бир қисим анализчилар униң орнини ладах райони билән охшаш қиммәттә, дәп қарайду. Һиндистан-хитай чеграсидики талаш-тартишта туруватқан “мәкмахон линийәси” билән чеградаш болған бу районни йеқинда һиндистанниң муавин президенти венкая найду әпәнди зиярәт қилғандин кейин, хитай һөкүмити буни “чеграда иғвагәрчилик қилған” ға чиқирип, қаттиқ наразилиқ билдүргән.

Һиндистан һөкүмити бу мәсилигә инкас қайтуруп: “аруначал райони һиндистанниң айрилмас бир қисми. Биз өзимизниң земинини зиярәт қилишта хитай һөкүмитиниң ағзиға қаримаймиз,” дегән. Буниң билән икки тәрәп оттурисида йәнә бир қетим “сөз уруши” башланған.

“һиндистан вақти” гезитиниң 14-өктәбирдики хәвиридә ейтилишичә, икки тәрәп оттурисида изчил давам қиливатқан ладах райониниң тәвәлик мәсилиси һәққидики сөһбәт өткән һәптә нәтиҗисиз ахирлашқан. Әнә шу сөһбәттин кейин венкая найду бир қисим һөкүмәт әмәлдарлири билән бирликтә аруначал районида хизмәт зияритидә болған һәмдә аруначал валийси билән бир қисим қурулуш ишлири һәққидә сөһбәтләшкән. Хитай ташқий ишлар министирликиниң баянатчиси җав лиҗйән бу зиярәттин чичаңшип кәткән һәмдә “биз һечқачан аруначал районини һиндистанниң земини дәп етирап қилған әмәс. Бу җай бизниң айрилмас земинимиз болған тибәтниң бир қисми. Бундақ җайни зиярәт қилиш пәқәт өзара ишәнчни сундуруп, икки тәрәп оттурисидики мунасивәткә зәхмәт йәткүзиду,” дегән.

Һалбуки, һиндистан ахбаратида чоң хәвәргә айланған бу мәсилә тоғрисида йеңи деһлидики анализчилар пикир қилип: “бу һал хитайниң бизни пүтүнләй чүшәнмәйдиғанлиқини көрситиду,” дегән.