Arunachal rayoni xitay-hindistan munasiwitidiki yéngi "Qiziq nuqta" bolup qaldi

Muxbirimiz eziz
2021-10-14
Share

Hindistan bilen xitay otturisidiki tarixiy zémin dawasida hindistanning sherqiy-shimalidiki arunachal rayoni muhim orunni igileydighan bolup, bir qisim analizchilar uning ornini ladax rayoni bilen oxshash qimmette, dep qaraydu. Hindistan-xitay chégrasidiki talash-tartishta turuwatqan "Mekmaxon liniyesi" bilen chégradash bolghan bu rayonni yéqinda hindistanning mu'awin prézidénti wénkaya naydu ependi ziyaret qilghandin kéyin, xitay hökümiti buni "Chégrada ighwagerchilik qilghan" gha chiqirip, qattiq naraziliq bildürgen.

Hindistan hökümiti bu mesilige inkas qayturup: "Arunachal rayoni hindistanning ayrilmas bir qismi. Biz özimizning zéminini ziyaret qilishta xitay hökümitining aghzigha qarimaymiz," dégen. Buning bilen ikki terep otturisida yene bir qétim "Söz urushi" bashlan'ghan.

"Hindistan waqti" gézitining 14-öktebirdiki xewiride éytilishiche, ikki terep otturisida izchil dawam qiliwatqan ladax rayonining tewelik mesilisi heqqidiki söhbet ötken hepte netijisiz axirlashqan. Ene shu söhbettin kéyin wénkaya naydu bir qisim hökümet emeldarliri bilen birlikte arunachal rayonida xizmet ziyaritide bolghan hemde arunachal waliysi bilen bir qisim qurulush ishliri heqqide söhbetleshken. Xitay tashqiy ishlar ministirlikining bayanatchisi jaw lijyen bu ziyarettin chichangship ketken hemde "Biz héchqachan arunachal rayonini hindistanning zémini dep étirap qilghan emes. Bu jay bizning ayrilmas zéminimiz bolghan tibetning bir qismi. Bundaq jayni ziyaret qilish peqet öz'ara ishenchni sundurup, ikki terep otturisidiki munasiwetke zexmet yetküzidu," dégen.

Halbuki, hindistan axbaratida chong xewerge aylan'ghan bu mesile toghrisida yéngi déhlidiki analizchilar pikir qilip: "Bu hal xitayning bizni pütünley chüshenmeydighanliqini körsitidu," dégen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet